KOHHRANA LAWI

MATHAIA 16:18
“Tin, nang, Petera i ni tih ka hrilh bawk a che; he lungpui chungah hian ka kohhran ka rem chho vang a, mitthi khaw kulh kawngkhârte chuan a ngam lo vang.”

Khawvelah sakhaw hrang hrang a awm a. Chung sakhuate chuan rinna an nei vek a, tih tur leh tih loh tur pawh an nei theuh a ni.

Nikhat chu nu pakhat hian an pastor hnenah, “Kohhrana lawi lovin kristian a nih thei em?” tiin a zawt a. Pastor chuan, “Nih theih tehreng mai, mahse hetiang ang deuh hi a ni ang, zirlai naupang, sikul kal ngai lo ang a ni ang a; sipai, sipai pawl (Army) a tel si lo ang a ni ang a; khua leh tui, chhiah pe ngai lo ang a ni ang a; thil zuar, dawrtu nei lo ang a ni ang.

Kohhrana i tel lo anih chuan, ram thar hmuhchhuah tum te, innghahna nei lo ang a ni ang a; lawng sipai, lawng karna nei lo ang a ni ang. Sumdawng, thlalera awm ang a ni ang a; lehkhabu ziaktu, lehkhabu chhiar ngai lo ang a ni ang. Rimawi thiam tak, rimawi tumtu pâwla tel lo ang a ni ang a; nu leh pa, chhungkaw nei lo ang a ni ang.

He khawvelah hian Pathianin awmze nei takin min siam a, min siam chhan te, min din chhan te leh keimahni-a a thil tum kan hriat loh chuan Football khelmi, Team telna nei lo ang maiin awmzia a awm lo ang.

Chumai ani lo a, sava mawi tak, bu nei lo ang kan ni ang a. Scientist ropui tak, a thil hmuh chhuah tumah hrilh ngai lo ang chu kan ni dawn a ni.” a ti a.

Kohhran-ah a kul a taiin inhmang lo mah ila, a kul a taia Kohhran kutke kan ni.