PATHIAN FINNA

PATHIAN FINNA

JOBA 37:5
Pathian chuan mak takin khawpui a tiri a, Thil ropui tak, kan hriatthiam phâk loh a ti a ni.

Hla phuahtu chuan, “Pathian thil rel dan hi, a va mak em. Hriat phak rual loh a ni; a tum zau zia; Thil te ber pawh a veng, Van thil a rel kim e, Pathian ruat ang zelin engkim a thleng” a ti.

Kan duh anga thil a kal loh leh kan tum anga kan awm loh hian mihringten Pathian thil rel dan leh remruatnaah lungawi lohna emaw vuina emaw duhthusam lohna kan nei ṭhin. Mahse Pathian chuan engkim a rel fel vek a, a tum dal rual a ni lo.

Sakhaw miril tawh tak hi nikhat chu Theihai kung hnuaiah ni a sat avangin a ṭhu chawl a. A bula mai hnah zam vel te leh a rah lian tak mai chu a en reng a. A rilru chuan, “Pathian hi a va han å tak em! Mai rah lian leh rit tak chu zar nei lo leh kung nei lo-ah a rah tir a. Leiah an bawk hniang hnuang a. Chutihrualin theihai rah tereuhte te erawh kung lian taka a dah leh lawi bawk si a. Pathian chu ni ila, hei ai hi chuan ka rêl fel deuh ang maw le” a ti neuh neuh a.

Chutia a tih lai chuan thli na tak a rawn thaw a, Theihai kung chu a kur lâwp lâwp a, a rah chuan a hnarah tak chuan a rawn tlâk a, na a ti em em mai a. Chu theihai rah chu lian deuh phei se chu a tlâk hlum loh pawhin a tlâk na viau ang.

Tichuan a rilru chuan Pathianin Mai rah lian tak kha Theihai kungah rah tir ta zâwk se, a tlâk nat dan turte a ngaihtuah a. Pathian thil rêl dan chu a fak a, Pathian thilsiam dan leh remruatnaah inrawlh a tum tawh ngai lo a ni.

Pathianin khawvel a siam dan hi a ropui em em a, thilsiam chi hrang hrang, thing leh mau, tlâng leh phâi, lui te leh dil te hi a nih tur ang thlapin a siam a. Lei leh vân leh a chhûnga thil awm zawng zawngte hian Lalpa ropuizia an tarlang chiang hle a ni.

A thiltihtheihnain lei a siam a, A finnain khawvêl a din, A hriatnain vân a kai pharh ta. – JEREMIA 51:15

Leave a Reply

Your email address will not be published. Required fields are marked *

Copyright © 2017 - 2020 Our Daily Bread Mizo.
Privacy Policy | Powered by MIZOHOSTING.