RINNAAH AWM EM?

2 KORINTH 13:5
‘Rinnaah chuan in awm emaw, mahni infiah ula, mahni inchhin ṭhîn rawh u. Krista Isua chu nangmahniah a awm tih hriatna in nei lâwm ni? Inhriatna in nei lo a nih chuan a lem mai in la ni.’

Kristian kan nihnaah leh ringtu kan nihnaah hian kan nunah thil pawimawh em em mai, keimahni ṭheuh kan inzawh tur a awm a. Chu chu tirhkoh Paula pawhin a inzawt a ni.

II Korinth 13:5 naa kan hmuh angin, rinnaah kan awm leh awm loh kan in enfiah ṭhin tur a ni. Rinna-a kan awmzia tilang turin mite hmuh theihin kan rah chhuak em? Krista chenchilhna leh awmpuina mahni kan inhre ṭhin em?

Mahni inenfiah lovin ringtu tam tak chu midangte rinna kan enfiah a, kan thlitfim sak a, an nunah Krista hmel a lang em kan ti ṭhin. Mahni inenfiah si lova midangte rinna-a an awm leh awm loh hmuh kan tum tlat chuan thil tha lo tak a ni.

Kan sualnate kan hre duh lo a, kan fel lohna te kan inhre duh lo fo a, mahni inthiam chawpna leh chapona-in kan khat ṭhin. Chu chu Setana duh dan a ni. Mahni fel leh ṭha-a inngaih a, midangte fel lo-a hmuhna leh ngaihna te chu keimahni kan inenfiah loh vang a ni ṭhin.

Chutiang mi ringtu kan nih chuan kan sual chu a va nasa dawn em!

Korinth khua mite khan mahni an inenfiah chuan rinna-ah an awm leh awm loh an inhre ngei dawn a. Rinna-a an awm ngei anih chuan Paula, an hnena rinna thu sawitu pawh a awm dawn a ni tih amah Paula ngei pawhin a sawi a ni.

Rinna-a kan awm leh awm loh mahni kan inenfiah fo chuan ringtu nun dik tak kan lo0 nei thei dawn a ni.

1 KORINTH 16:13 – ‘Inring rengin awm ula, rinnaah ding nghet ula, huai tak leh chak takin awm rawh u.’