THUNGRUL LO

1 PETERA 3:9
‘sual sualin thungrûl suh ula, ânchhia pawh ânchhiaa thungrûl lovin, malsâwm hlauh zâwk rawh u; malsâwmna dawng tûrin asin Pathianin a koh che u.’

Missionary pakhat chu ei leh in man tlawm zawk ei-a inhnawh puar turin thingpui dawr-ah a chawl a. Dawr nghâktu nula chuan, “Ka pu, ka pui thei che ang’em?” a ti a. Missionary chuan, “Yes, ma’am” tiin a chhang mai a. A rilru-ah Pathian thu tam tak a luh avangin thildangin a rilru a luah thei mawlh lo a ni.

Dawr nghâktu nula chu rawn kal lehin thinrim deuh hian, “Chung zawng chu em ni i sawi thiam a?” a rawn ti a. Missionary chuan “Yes, Ma’am” tibawkin a chhang leh a. Dawr nghâktu chu a insum zo lo ṭep a ni. Thingpui leh a hmeh a rawn pêk pawh a dawhkanah a theh phei lo chauh a. Missionary chuan a chêtzia zawng zawng chu a hmuh hmaih hauh lo a, engtin mah a ti lo.

Thingpui chu a in zo a, dawhkanah dollar 5 a hnutchhiah a. Tichuan, cashier hnenah a thingpui in man a zâwt a, a man pêk a tum lai chuan, cashier chuan, “Ka pu, dawhkanah khati zât pawisa i dah tawh a, a man a ngai tawh lo ang” a ti a.

Missionary chuan, “Ni lo e, ka pi, saw saw chu dawr nghâktu nula, thingpui min rawn petu lawmman (TIP) atâna ka dah a nih saw” a ti a.

Chutah dawr nghâktu nula chuan a lo hre reng a. Dollar 5 lai mai a lawmman atâna Missionary in a dah chu mak a ti a, a chunga thinrim taka a chêtna avâng khan ngaihdam a dil ta zâwk a. Missionary chuan nula hnenah chuan, “Harsatna lian tak i nei niin ka hria a, mahse inkawmna hun a awm si lo a, kha khân tlêm tala i harsatna a sutkian ka beisei” a ti a. Chu nula rilru chu a hneh em em a, a chanchin te chu a hrilh ta zâwk a. Chu dâwrah chuan Pathian thu te inhrilhin a piangthar ta a ni.

Midangte siamṭhat tum hi a ṭha e. Amaherawhchu midangte zirtirtu, fuihtu leh entirtu nih hi a ropui takzet zawk a ni.