ISUA HMUSIT

SAM 37:1-2
‘Mi sualte avângin intihrehawm suh la, An thil dik lo tihte awt bawk hek suh. Hlobet angin an vuai ang a, Hnimhring angin an ro mai dâwn si.’

Roman Emperor lâr tak, Julian-a kha Kristiante haw em em tu a ni a. Remchang a hmuh phei chuan a tiduhdah thei hle niin an sawi. Persian nena an indo ṭumin thih ngam khawpa nain hliam a tuar a. Chutia na taka a awm lai chuan a kut aṭanga thisen rawn chhuak chu a kut lehlamah tikaiin a theh darh a, a theh darh rualin “Oh Galilean, Pathianin a hneh ta a che” a ti a.

A chanchin an sawi leh zelna-ah chuan Julian-an harsatna a tawn laiin a sipai, amah zuitu pakhat hian Antiokei ringtu pakhat hnenah, “Ṭhiana, thingrem siamtu fapa chuan eng nge a tih a?” tiin a fiam a. Ringtu chuan, “Lei leh van leh khawvel siamtu, thingrem siamtu tia i koh nawmnah chuan Emperor Juliana kuang tur a siam mek e” tiin a chhang a. Rei pawh a ni hman lo ang, Julian-a thih thu an hre zui ta nghal a ni.

MATHAIA 13:54-56 ah khan Lal Isua an tihnawmnah thu ka hmu: ‘An khua chu a lo thleng a, an sunagog-ah chuan anmahni a zirtîr a; tichuan, mak an ti hle a, “He mi hian he finna leh hêng thil mak tihtheihna hi khawi ata nge a hmuh? He mi hi mistiri fapa kha a ni lo vem ni? A nu pawh Mari an tih kha a ni lo vem ni? A unaute pawh Jakoba te, Josefa te, Simona te, Juda te kha an ni lo vem ni? A farnute pawh kan zîngah an awm vek lo vem ni? Hêng zawng zawng hi khawi aṭanga a hriat nge?” an ti a.’

Lal Isua sawichhia-a a thutak uannan hmangtute chu hremin an la awm ngei ang.

THUFINGTE 3:34 – ‘Chapote chu a hmusit a, Pachhiate erawh chu a duhsak ṭhîn.’

‘Amah an han en a, an hmêl a hlim ta a, An zak ngai tawh lo vang.’ – SAM 34:5