PATHIAN NUNG PAKHAT

HEBRAI 1:3
‘Ani chu a ro zawng zawng luahtuah a ruat a, amah hmangin lei leh vân hi a siam a, Ani chu a ropuina êng leh a zepui putu a ni bawk; engkim hi a thiltihtheihnain a khai ding a, sual faina kawng a siam hnuin Chungnungbera ding lamah khian a han ṭhu ta a.’

1 TIMOTHEA 3:16 – ‘Kan sakhaw thurûk rilzia hi hnial rual a ni lo ve: Ani chu tisa puin a lo lang a, Thlarauvin a dikzia a tilang a, Vântirhkohte pawhin an hmu a, hnam tin zîngah puan darh a ni a, khawvêl puma miin an ring a, Ropui taka lâk chhoh a ni ta.’

General Lew Wallace-a chu rêl-ah chuangin hmun hla takah zin a tum a. Chu rêl-ah chuan Pathian ringlotu lâr em em zinga mi, Colonel Robert Ingersoll-a a tawng hlauh mai a. Kristiante rinna chungchang sawiin an inkawm a. Kristiante chu mi å tak, dik lo leh awihawm loh taka che ṭhin an nih thute an sawi a.

Ingersoll-a chuan Wallace-a hnenah, “Ṭhiana, mifing tak leh lehkhathiam tak i ni a, thil hre zau tak leh mi te pawhin an chung en che i ni a. Engatinge Kristiante rinna dik lohzia leh an Pathian chu Pathian nung anih lohzia te hi ziakin lehkhabu i siam loh le. Chutiang chuan ziak la chu miten an hre lehzual che ang a, chûng lehkhabu chu lehkhabu vâng tak, rotling, mite hlut em em a ni dawn asin.” a ti a.

General Wallace-a chuan uluk takin a ngaihtuah a, ziah a tum ta a. A hmanrua turte pawh a lakhâwm a, a ziak ta a. Mahse Bung 4-na a ziah thlen chuan Isua Krista chu mi tak tak, hmanlai mi mai mai anih lohzia chu a zirchianna aṭangin a hre ta tlat mai a, leh kum tam tak kal tawhah khan he khawvela awm a nihziate chu a hre ta zâwk a. Pathian thiltihtheihna a chungah a thleng a, Isua chu chhandamtu atan a pawm a, a lehkhabu ziah lai bulah chuan a ṭhingṭhi-a, a nunah lo lut turin a sâwm a, a piangthar ta zâwk a ni.

‘Simon Petera chuan a chhâng a, “Krista, Pathian nung Fapa chu i ni e,” a ti a.’ – MATHAIA 16:16