ISUA ṬHIANTE

Luka 14:24
‘Ka hrilh a che, mi ka sâwmte khân pakhat mahin ka ruaiṭheh an ei lo vang,’ a ti a,” a ti a.’

Lal Isuan tehkhin thu a sawi a: Mihausa deuh mai hi a awm a. Ṭumkhat chu a ṭhianṭha te nen chuan ruai ṭheh a tum a. Sawm hmaih a nei ang tih a hlau em em a. Ruai ṭhehni tur leh a hun turte pawh an hman kim theihna turin a ruat fel thlap a. Tichuan a ṭhiante chu a hriattir ta a, a ṭhianten an hriat chuan an lawm em em a, an vai chuan kal vek pawh an tum a ni.

Mihausapa chu nasa takin a inbuatsaih a, a in leh a vel zawng zawngte pawh a chhiahhlawhte a tihfai tir vek a. Hna an thawk suau suau a, ei siamtute pawh an buai a, a tui thei ang berin an buatsaih a.

A hun a rawn thlen chuan a ṭhiante ko turin a chhiahhlawhte chu a tirchhuak a. An rawn kir meuh chuan, “Ka pu, i ṭhiante chuan tih tur an lo nei a, an rawn kal hman dawn lo” an ti a. A ṭhian a sawm zawng zawng te chu an rawn hman ta lo a.

Mihausapa chuan, “Chhuak ula, kawtthlerah te, kawmkarah te kal thuai thuai la, pachhia te, piangsual te, mitdel te, kebai te hetah rawn hruai lut rawh” a ti a. Chung mite chuan ruai chu an ṭheh ta a, mahse an la ṭheh zo thei lo va, lamliana mi te, dai-a mite chu an sawm leh a. Mirethei tete-ten a sawmna ngai pawimawha hlim taka ruai an ṭheh avangin mihausapa chu a lawm ta em em a, a sawmna ngai pawimawhlo tute chungah erawh a thinrim takzet a ni.

Isuan min sâwm reng asin! Kan awm ang angin ani chuan min hmangaih a. A sâwmna chhângtute a hnar ngai lo a, a ṭhiante an ni zawk ṭhin. Lal Isua’n ka thupek apiang che u in tih chuan ka ṭhiante in ni ang a ti a. A ṭhiante chu a sawmna hnar lo va, a thupêkte zawmtute chu an ni.

Johana 15:14 – ‘Thu ka pêk apiang che u in tih chuan ka ṭhiante in ni ang.’