A TA KAN NI

SAM 139:4
‘Ngai teh, Lalpa , ka sawi hma pawhin ka sawi tûr zawng zawng chu i hre vek si.’

Kan taksa, thi thei leh ral mai tur ni si hi awmze nei leh thil ti tura siam a ni a. Chu chu kan hriat hma chuan min siamtu Pathianina keimahni-a a thil tum hi kan hrefiah ngai lo ang a. Nun hian awmzia reng a nei lo ang.

I lungphu kha han ngaithla teh le. I kut zungṭang kha han chet vel teh. I ke zungṭangte kha han chet vel la, i duh dan takin i lu han her vel teh. Heng hi hre reng ang che.
• Tumahin i taksa ang leh i kutphah zia ang kha an nei ve lo.
• I aw rawl chhuak ang chiah kha tumahin an nei ve lo.
• Tumahin i inthlahchhawna chi hrang hrang kha an nei ve lo a, i ruangam leh i taksa hawiher ang kha an nei ve lo.

Chung lo pawh Pathianin a din leh ruahman ang chein tumah a dinin a ruahman lo a. Nangmah chauh kha nangmah i ni. I nun hlui ang tumahin an nei ve hek lo a, i thil tih tawh te, i sawi tawh te tumahin an ti bawk lo. Pathianin duh takin midangte ang lovin ropui takin a siam che a ni.

Pathian chuan a bo a bang awm lovin a siam dan che a hria a, engvanga siam che nge i nih tih pawh a theihnghilh lo. I nuna thil thlengah felhlel a awmin siamṭhat dan a hre vek a, a thupek aṭanga i tlanbo pawhin lâk lêt leh dan che a thiam a ni.

Danglam takin ama tan, a ropuina turin a siam che a, a kutchhuak i ni a, chhinchhiahna che pawh a nei a ni. A hnen ata kan tlanbo-a, mahse min zawng chhuak a, min tlana, a thisenin min lei a, kan taksa hian amah chu kan chawimawi mai tur a lo ni.

1 KORINTH 6:20 – ‘mana lei in ni tawh asin; chuvângin, in taksa hian Pathian chawimawi rawh u.’