A TÛK LUNGKHAM

MATHAIA 6:27
‘Nangniho zîngah lungkham avângin tu nge mahni nun tisei hret thei?’

Nimina i thudik ṭan vang emaw i thil tih dik avangin a tukah hlauhthawnna i nei tawh em? Nimin i thil tih dik loh vang emaw i rinawm loh avangin a tukah lungngaihna i nei tawh em?

Nu pakhat hian chawlhkar khatah nikhat tal hi lungngaihna ni atan a hmang ṭhin a. Hun harsa leh hrehawm a tawnni apiang chu chhinchhiahin a notebook-ah chuan a ziak ṭhin a. Entirnan: ‘Lungngaihni, Nilai’. Mak tak maiin chung a lungngaihna zawng zawng te chu chinfelin a awm fo ṭhin a ni.

American poet lar tak, Ellen M. H. Gates chuan rilru-a lungngai ṭhinte tana Pathiana thlamuanna a awmzia a poem ‘Muangin mu ang che’ tihah chuan hetiang hian a ziak; ‘I pindan reh tak hnuaiah chuan muangin zanmu chhing ang che; Lalpa Pathian chuan a veng ang che; hun kal tawh manganna zawngte kha a kiang tawh ang; I thlamuanna tibuaitu te kha; Lalpan a lak kiansak ang che; A arsi engmawi tak chu i chungah êngin a veng ang che a; Muangin mu ang che, mangtha le’ tiin.

Pathian fate kan ni a, Pain a fate a kalsan ngai lo angin Pathianin min kalsan dawn lo tih i hria ang u. Lungkham mangan buainaten kan nun min chimbuai ṭhin a, nitin ni leh thla a eng reng thei lo a, lungngaihna chhumpui nasa takin min hual châng a awm ṭhin. Khawvel kan lungkham avângin kan buainate chinfelin a awm lo va, Pathian chuan engmah lungkham lo turin min ti a ni.

MATHAIA 6:11 – ‘Vawiinah hian kan ei khawp chaw min pe ang che.’