ANGEL DUNGTHUL

Hebrai 13:2
‘Mikhual chungah ṭhat chuh ula, chutiang tiin ṭhenkhatten hre lovin vântirhkohte an thleng asin.’

Damdawi in pindan chu a reh ṭhuap hlawm a. Damlo tinreng an mu tlar tuar a, a ṭhenin lehkhabu an chhiar a, a ṭhen an hnar thlerh thlerh mai bawk a. Room lehlamah chuan a tuka zai mai tur, Pi Natalie-i an tih chu khawhar takin amahin a awm a.

Chu damdawi in awmna khuaah chuan awmtir anih avangin hmelhriat a nei lo a, tlawhtu pawh a nei lo a, a khua a har zual em em a ni. A mu thei lo va, a tuka zai tur anih lah chu a rilruin a hre reng a, ṭah vak mai a nap a. Chutih lai tak mai chuan kawngkhar a rawn inhawng a, nurse nula pakhat hi a rawn lut a. “I va khawhar awm ve Pi Natalie, nurse zirlai ka ni a, paper khawih tur ka ngah deuh a, inkawm pahin i bulah ka lo awm ang chu” a ti a.

Pi Natalie-i chuan, “Tehreng mai, ka khua a har khawp mai, inkawm ila” a ti a. A chanchinte an sawi a, an inkawm hnu rei lo teah chuan Pi Natalie pawh chu a muhil ta a. Nurse zirlai chuan a tihtur a tih zawh chuan a chhuahsan leh ta a.

A tuk a lo ni a, inzaina room-ah chuan an nawr lut ta a. An zai hma chuan Pi Natalie-i chuan, “Nizana nurse zirlai rawn kal kha tu ber nge, kan zingah a awm em?” a ti a. Mahse chu damdawi inah chuan nurse zirlai an awm loh thu an hrilh a, mak an ti em em a.

Pi Natalie-i chu lungngaihna leh khawharnain khat mah se a thil tawn avang chuan lawmna hlirin a khat ta zâwk a. Chu nurse nula hnenah chuan lawmthu sawi a va châk tak em! Nurse zirlai a ni tak tak ang nge Vantirhkoh ni ang le!

Engpawh ni se, Pi Natalie chunga thil thleng ang hi Pathian hnathawh sawi tur tam tak a awm. Pathian chu kan zingah a chêng reng a ni.

Mathaia 13:41 – ‘Mihring Fapa hian vântirhkohte a tîr chhuak ang a, a ram ata mi titlu thei zawng zawng leh thil sual titu zawng zawng an thiar chhuak ang a.’