MIN VENG RAWH

ISAIA 40:11
‘Berâm vêngtu angin berâm rual chu a châwm ang a, A note chu la khâwma pawm chungin A puite chu a hruai dial dial dâwn e.’

Kum 8 leka upa, Jonathana chu naupang harhvang tak a ni a. A thil thiam thar apiang chu intithei takin a nu leh chhungte hmuhah chuan a lantir ṭhin a. A nu hmuh lai ngeiin thingkung sang takah te a lawn a, mahse a nu tan chuan hmuh nuam lo tak a ni a, a tlâk a hlau a, a inti na ang tih a hlau em em a ni.

Vawikhat chu a cycle a khalh a, a hma chawi te, a steering tuai vir te leh a thiam thar chi hrang hrang chu a han pholang vel a, a nu chuan hmuhnawm a ti em em a. Mahse chak taka a rawn tlan, a free-turn tur chu lung lian vak lo a ke hmain a chil avangin a vir nawk a, kawngpui lei char-ah chuan a insawh chawrh a, a let ta reng mai a. A nu chu a au ṭhawt a, rang taka tlan pheiin a fapa chu a va pawm tho a, a khup leh a kiu pilh te chu a thi ser ser a, a kawr a han keu a, a insawhna lamah a taksa te chu a sen ter tuar bawk a.

A nu chuan daktawr phone a tum a, mahse Jonathana chuan a ṭhat thu leh a nat vak loh thu sawiin daktawr chu phone a ngai lo a ti tlat a. Tichuan an inkai tho a, in lamah an haw ta a ni.

Nu-in a fa a hmangaih a, a vêng a, a awmpui ang khân, keini pawh Pathian fate kan ni a, a kutin min kuangkuah reng a, a âwm nghengin min pawm reng a, kan nat leh hrehawm te a hlau ṭhin a ni.

A hnen ata tlanbo ṭhin mah ila, ani chuan min zawng reng a, min zui reng a, kan tihsual inhriaa lungchhira a lam kan hawi hun nghâkin min thlir reng a ni.

SAM 42:8 – ‘Lalpan a ngilneihna chu chhûnah a tilang a, Zânah a fak hlain min awi. Mi tinungtu Pathian hnênah ka ṭawngṭai ang.’