NUNNA TUI

JOHANA 7:37-38
‘Kût ni hnuhnûng ber, ni ropui berah chuan Isua a ding a, aw ring takin a au va, “Tuihâl apiang chu ka hnênah lo kal sela, in rawh se. Lehkha Thu-in a sawi angin, tu pawh kei mi ring chu a kawchhûng aṭangin tui nung luite a lo chhuak ang,” a ti a.’

Huan enkawl thiamte chuan thlai chungchang an zirchiannaah, thlai te hi an ṭhang muang em em a, lei dèp aṭanga inches 5 leh 6 vela thûka awm an zungin tui a mamawh ang a hmuh loh phei chuan a thi mai ṭhin a ni, an ti.

Thlai rah ṭha tak leh hrisel tak nei tur chuan zing ni êng chhuah hma leh tlai ni tlâk lama tui pek ṭhat an mamawh em em a. Enkawlna ṭha tak hnuaiah chuan thlai an ṭha thei a ni.

Mithiamte chuan kar khata tui vawi khat chauh peka nung thei thlai an awm laiin ṭhenkhat chu nitina tuia chawm ngai an awm, an ti a. Chutihlai chuan tui pek ṭhat loh thlaite chu nung ve ṭawk ṭawk mah se an ṭha tak tak thei lo va, an nih tur ang an ni tak tak thei lo a ni, an ti bawk.

Thlaite chu an tui a hal theih angin mihring pawh kan tui a hal ve ṭhin a. Tui tel lovin mihring phei chu kan dam thei lo hial a ni.

Samari hmeichhia khan tuichhunchhuah bula Lal Isua a tawn khan, khawvel tuikhur chu chawi ṭhin mah se a tui a hal leh ṭhin thu a hrilh a, Lal Isua chuan, “Tupawh he tui in apiang an tuihal leh ang; tupawh an hnena ka pêk tur tui in apiang erawh chu kumkhuain an tuihal lo vang, keiin an hnena tui ka pek tur chu an kawchhungah tui hna a lo awm ang a, chatuana nun thlengin a chik chho vang,” a ti.

Hmeichhia chuan, “Ka pu, chu tui chu mi pe rawh, ka tuihal loh nan leh, heng thleng thlenga tui chawi tura ka lo kal ṭhin loh nan,” a ti a. Chu nunna tui chu Lal Isuan a thlawnin min pe! Thlàiten hrisel taka rah an chhuah theihna tura tui an mamawh angin keini pawhin Lal Isua nunna tui hi kan mamawh a ni tih hriain nitin i tlan ang u!

THUPUAN 22:17 – ‘Thlarau leh mo chuan, “Lo kal rawh,” an ti a. A hria apiang pawhin, “Lo kal rawh,” ti ve rawh se. Tuihâl apiang lo kal sela, nunna tui duh apiangin a thlâwnin han in rawh se.’