TAR ENKAWL

TAR ENKAWL

LEVITICUS 19:32
‘Lu-a kêlsam ṭo tawhte hmaah din nachâng hria la, upate chu zah rawh. In Pathian ṭih rawh u, Lalpa ka nih hi.’

A vawikhatna turin Cathy-i leh kum lama upa tawh tak, Hank-a te chu an inhmu a. Chu putar, lu ṭuak tawh tak leh sam thur bum, rim pawh nei hial tawh bula han chêt vel chu hrehawm a ti em em a. Kum lama upate chhawmdawlna kawnga a hna thar thawh tur chu bansan leh hial a chak a ni.

Pu Hank-a chu a chêr em em a, a sang bawk si a, a lu erawh a lian a, a hang reuh bawk si a, la hmu ngai lo tan chuan nêlawm loh tak a ni a. Cathy-i nena an han inbiak te chuan nula tan chuan enkawl peihawm loh tak a ni a, Cathy-i chuan a hna chu a bânsan hial reng a ni.

Nikhat chu Cathy-i lengchhuakin chu putar chu kawng sirah a hmu leh a, a kawr hâkte chu a ṭet hniang hnuang a, chhungkaw nei lo ang mai a ni a, a tiang kawm chu vuanin a ṭhu mai mai pawh chu a lo sai nger nger mai a. Cathy chu a ding a, a khawngaih deuh avangin a kiangah chuan a va kal leh a, midangte khawngaihna thinlung a neih theih zawng zawng chu sawmkhawmin Cathy chuan Pu Hank-a a chu a kâwm leh ta a.

Rei an inkawm hnu chuan Pu Hank-a chu tar tawh hle mah se a rilru leh ngaihtuahna erawh a la ṭha khawp mai a, Cathy-i chuan a dinhmun zawng zawng; nupui a neih loh thu te, a chhungten an awmpui peih loh avanga vâk mai mai a nihzia te, mi tute emawin ei tur an pêk bak inhnangfâkna a neih loh thu te a hriat chuan a khawngaih ta em em a. Chutiang dinhmun chu mi tam tak an awm a ni tih a hriatin tar ho enkawl tur chuan a inpe leh ta a ni.

A châng chuan pitar leh putar ṭawp tak tak, kawngpui pawh mahni-a kân hlei thei lo kan hmu fo awm e. Pu Hank-a ang hi kan chhungkua-ah an awm em?! Tar tawh mah se harsatna nei thei an la ni a. An ṭhianṭha ber atan kan inpe thei em le?!

Tute pawh hi Pathian zara kan dam zel chuan pitar, putar kan la ni vek thei a. Chutih hunah chuan ṭhianṭha, min enkawltu tur kan la mamawh ve dawn a ni.

Leave a Reply

Your email address will not be published. Required fields are marked *

Copyright © 2017 - 2020 Our Daily Bread Mizo.
Privacy Policy | Powered by MIZOHOSTING.