KAWNG HARSA

EXODUS 4:12
‘Chuvângin, kal mai rawh, i kâ chu ka thuam ang a, sawi tûr ka zirtîr dâwn che nia,” a ti a.’

Aigupta rama Israel fate tihduhdahna hnuaia an awm khan hrehawmna tinreng an tuar a, mahni duhthu pawha awm thei lovin nun rawng takin an chungah ro rêl a ni a. Chhanchhuaktu an ngai a, an mamawh a ni.

Pathianin an lungngaihna te chu hriaiin chhanchhuah a duh a, Mosia hmangin a hruai chhuak ta a ni tih kan hria. Chhiahhlawh dinhmuna ding, hrehawm taka phuara awm chu phelh zalen an ni ta a. Hrehawmna nasa tak aṭanga chhanchhuah lawmawmzia leh hlimawmzia a hrechiangtu an ni.

Chutiang chu ni mah se rampalaileng paltlanga, thlaler vaivut dai-a ramtiam an panna kawngah rinhlelhna leh chhanchhuah lawmna kha an nei ta lo a, an thinlungte chu a hel a, an phunnawi a, Aigupta rama hrehawma la awm kha an duh hial ta zawk a nih kha.

Louise Haskins-an ‘Travelling toward sunrise’ tih a ziahnaah chuan tihian a ti: “Zin mite chu mi huaisen, rinna nei, an thlenna hmun tur thlir a, tlânga nichhuak hmu turin kawng chhuk chho leh bumboh zawhin hawikir ngai loin an tum ram an thleng ṭhin a ni. Chung mite chuan min fuih lo em ni! Zin mi hnenah chuan, ‘Him tak leh dam taka hmun ropui, ramtiam ka thlen theihna turin Eng (Light) min pe rawh khai’ ka ti a. Zin mi chuan, ‘Ngawi teh, hmun ropui, ramtiam thleng tur hian kawng awlsam a ni lo. I Pathian chu va zawng la, a kutin a chelh tlat ang che. Chu chu Eng (light) aiin a ṭha a, him taka hruai theitu tur che a ni’ min ti a.

Ka kalchhuak a, ka Pathian chu ka zawng ta a, ani chuan mi a hmangaihna kut serhin min lo chelh a, ka zinkawng chu ka zawh ta a, khâm leh suar-ah te pawh him takin mi hruai zel a ni.” a ti a ni.

Vanram panna kawngah hun harsa leh khirh tak tawn chang kan nei ang! Mahse chungte avang chuan Pathian hawisan lo ila, chung hun chu a ni Pathian kan hnaih zawkna tur chu!