AMAHA NUNG THEI LO
JOHANA 15:5
‘Kei grêp chu ka ni, nangni a pêngte chu in ni. Tu pawh keimaha awm renga, kei pawh amaha ka awm rengna chu tam takin a rah ṭhîn; keimah lovin eng mah in ti thei si lo.’
US-ah khuan thei chi khat, Grape anga hrui zam nei hi a awm a. A hming chu ‘Scuppernong’ an ti a. A zam a mawiin a nalh em em mai a. Ramhnuai ngaw ṭha tak, thingkung tam tak awmna hmunah a awm ṭhin a, chungah te chuan a ṭha thei em em a ni.
Rah a nei a, a rahte leh a hnahte chu damdawi ṭha tak a ni a. Chumai a ni lo, chaw ṭha tak a ni a, a hrisel em em mai bawk a ni. Chutihrual chuan ei theiha an siamchhuah hnuah a man a to lo a, mi harsa leh retheite pawhina an lei ngam tâwk a ni.
United States chhim lamah phei chuan dawr zawng zawng hian an zuar a, a lâr em em mai a ni. Chutiang khawpa thei hrisel leh ṭha, tui bawk si chuan danglamna a nei ve tlat mai a. Thei dang nena an danglamna chu amah chauha a nung thei lo chu a ni.
Ṭha taka zama nunga rah chhuak tur chuan a bul hnaia thingkung awmte ṭanpuina a mamawh a, thingkung ṭha tak tak awm lohnaah chuan a nung thei tlat lo a ni. A zamna thingkung aṭang chuan la thla ila, kan huanah phun ve ngawt dawn ila chu a nung ve thei dawn lo a nih chu!
Ringtute hi Scuppernong ang kan nihna lai hi kan sawi tum chu a ni a. Keini mihringte hi Pathian tel loin kan nung thei lo a, kan nunna hnar tak tak Lal Isua tel lo chuan mitkhap kar lekah pawh thi mai thei kan ni. Chutiangin Lal Isua tel loin engtin nge chutiang chuan rah kan chhuah ve theih ang?
Scuppernong anga nunga rah chhuah tur chuan Pathian kan nghen tlat a, Bible chhiar a, ṭawngṭai a, inkhawm a, zaia fakin kan nitin nunah a thupekte kan pawm chuan amahah kan awm a ni tih kan inhria ang.
1 JOHANA 2:5 – ‘Tu pawh a thu pawm erawh chu amahah chuan Pathian a hmangaihna a famkim takzet tawh a ni. Amahah kan awm tih hemiah hian kan inhria a ni.’
