ZING-MI

Exodus 16:7
‘Tin, zîngah pawh Lalpa ropuina chu in hmu dâwn e; Lalpa chunga in phunnawina kha a lo hriat tâk hi. Keinite chu eng nge kan niha, kan chunga in phunnawi mai ni?” an ti a.’

Pathianin chhun leh zan a siam a, an pahnih chuan ṭha a ti em em a ni. Chutihrual chuan Pathianin ‘Zing-mi’ (Morning People) a siam a tih theih ang.

Zing-mi te chuan zing chu an chakna hnar an lakna hun atan an hmang ber a. Tin, ‘Zan-mi’ (Night People) pawh an awm tho mai. Chungmite chuan zan hun pawh Pathian tan an hmang ṭangkai ve ṭhin tho a ni. Chutihrual chuan zing lam hi Pathianin mal a sawm hle a ni tih Bible kan chhiar chuan a lang.

Bible-ah chuan zing taka tho-a Pathian pawla hna thawk ṭhin mi hrang hrang kan hmu a, an zingah chuan; Abrahama te, Mosia te, Joshua te, Gideona te, Joba te leh Isua ngei pawh zing lam mi a ni tih kan hmu.

Exodus 16:7 kan chhiar chuan Pathianin Israel fate hnenah a thiltihtheihna chu zingah an hmuh tur thu a hrilh kha. Zingtin ramtiam Kanan an thlen hma Manna a pe ṭhin a ni.

Zingah chuan kan lungngaihna te, kan thinurna te hi a lo bo zo ṭhin a. Sam 30:5-ah chuan ti hian kan hmu, ‘A thinur chu mit khap kâr chauh a ni si a; A duhsaknaah chuan nunna a awm ṭhîn; Ṭahna hi riak tûrin tlai lamah a lo lût thei a, Zîngah erawh chuan hlimna a lo thleng ṭhîn.’ tiin.

Kristiante tana zing hun a pawimawh em em na chu Lal Isua thawhleh hun kha zing anih vang a ni.

Zing hun hi kan hmang ṭangkai ve em le? Tlai taka thoin Pathian pawl hman loin thildangah kan hmanhlel ṭhin zawk em ni? Mizoram-ah chuan Kohhran tin deuh thawin zing ṭawngṭai inkhawm an nei a, hemi vang pawh hi a ni ang; zing lamah thil ṭha lo leh sual rawngbawlna ang chi reng reng a thleng ngai lo a ni.

Ezekiela 12:8 – ‘Tin, zîngah chuan Lalpa thu ka hnênah a lo thleng a.’