LUNGAWINA

TIRHKOHTE 17:28
‘‘Amah avângin kan nung, kan che, kan awm a ni si a,’ tia an sawi ang khân. Nangni zînga hla phuahtu ṭhenkhat pawhin, ‘Keini pawh a thlahte kan ni,’ tia an sawi ang kha a ni.’

Lungawina hi khawvelin a zawn a ni. TV kan en ṭhin a, kan tana tha lo min kawhhmuhtu ni lovin kan lungawina min siam sak tumin sumdawngten an thil neih an infaksiak a. Kan beisei kan duh leh mamawh, kan lungawina kim min pek an tum a ni.

Anih leh chung karah chuan lungawina kim nei kan hria em le! Kan lungawi vek em! kan chhungkua kan lungawi em! kan khawtlang hi a chhûnga chengte-ah a lungawi em le!

Chawlh nuam leh lungawithlak neih tumin hmun nuam leh hotel changkang takah te kan kal ṭhin a. Nikhat lek emaw, chawlhkar khat te emaw, thlakhat pawh ni se intihhlimna hun hman kan rel a, kan hmang fo ṭhin bawk. Kan hun hman danah a hunlai nanana chuan kan lung a awi ṭhin fo ang. Chung hun kan hman zawh hnu-ah pawh kan la theihnghilh lo a, kan hre reng a, kan lung a la awi reng thei e. Anih leh kan chawlh a lo zo a, kan nun lo la awm zel turah kan hlim reng tho ang’em le!

In nuam tak sak tumin kan tha leh zung, ngaihtuahna leh sum leh pai tam tak kan seng a. Chungte chu kan lo nei ta a, hlimna tluantling leh lungawina kim min pe em!

CS Lewis-an a lehkhabu lar tak, ‘Mere Christianity’ ah chuan ti hian a ziak, “He khawvelin a pek theih loh lungawina kim châka ka tui a halin, hmu-a ka inhriatna leh chu lungawina ka hmuhna khawvel dang atana siam ka nihnaah chuan a ni” a ti.

Ni e, khawvel dang atana siam kan ni asin! Lungawina nei tura nawrna nun hi a na em em a, mahse kan lungawina kim chu Pathian thu-ah chauh kan hmu a. Hlimna thuruk, a hmu tawhte lungawina chu i neih theihna turin Lalpan malsawm che rawh se!

SAM 16:11 – ‘Nunna kawng chu mi kawhhmuh a, Hlimna kim chu i bula awm a ni, I ding lamah chatuan nawmna a awm bawk si a.’