PA TANA HUN PEK

PA TANA HUN PEK

GENESIS 6:9
Hei hi Nova thlahte chanchin chhuina a ni. Nova chu mi ṭha a ni a, a dam rualpuite zîngah sawisêl kai lo awm chhun a ni. Nova chu Pathian nên an lêng dûn ṭhîn.

A lehkhabu ‘Unto the Hills’ ah chuan Billy Grahama chuan hmeichhe naupang pakhat leh a pa inṭhianṭhatna chanchin hetiang hian a sawi.

An pahnih chuan tlaitin kawngah kal dunin thing leh sava mawizia te sawiin kalkawnga an tawhte incheina leh hmel te sawiin an titi ṭhin a. Hlim takin an inkhawm ṭhin a ni.

Nikhat chu a pa chuan a fanu-ah thil danglam a awm niin a hria a. Tlaikhat kawng an kal dun chu a fanu chuan chhuanlam siamin a kal pen san ta daih mai a. A pa chuan a lo ṭhanlen ve tak avang te, a rilru pawhin puitlin lam a pan ve tâk avang te, pa bula awm reng chu nula tan ṭha-a a hriat tawh loh avangte niin a hria a. A hriatthiam em em rual chuan a thinlung chhungril tak tak erawh a na veng veng a, a khua a har ngawih ngawih a ni.

A fanu awm ve tak loh avangin a pianchamte chuan a rukin a hlim reng reng lo a. Mahse a fanu chuan tunhmaa tlai an lendun ṭhin laia slipper a siam sak, ama kutchhuak ngei mai chu a rawn present hlauh mai a. A lawm em em a ni.

Mahse a fanu hnenah chuan, “I slipper min pek avangin ka lawm takzet a ni. Nangma min siamsak ngei a ni tih ka hriat phei chuan ka lawm zual a. Mahse ka duh ber chu i thil min siamsak leh mi tihsak zawng zawng aiin nangmah hi ka duh ber zawk a ni. Nang nena inkawm a, hlim taka nun hman aia lawmawm ka tan a awm lo” a ti a.

Aw le, Kan Pa, Vana mi pawh hi a faten kan kal pen san ṭhin a, kan buai em avangin amah nen fianrial hun kan nei hman lo ṭhin em le? Atan hun pe ila, engkim a hnenah thlen ila, malsawm kan ni ang.

EXODUS 33:11 – Miin a ṭhian a bia ang hian Lalpa chuan Mosia chu inhmachhawn meuhvin a be ṭhîn.

avatar
  Subscribe  
Notify of
Copyright © 2017-2019 Our Daily Bread Mizo.
Privacy Policy