TAWNGTAINA CHHANGTU

ROM 2:4
A nih loh leh, simtîr che a duh avângin Pathian chuan ngilnei takin a nghâk ṭhîn che tih hre lovin, ṭhatna a ngahzia leh a dawhtheihzia leh a entheihzia chu i ngainêp em ni?

Kum tam tak tak liam taah khan Atlantic tuifinriat paltlangin lawngah mi tam tak an chuang a. Chu lawngah chuan Bible zirtirtu leh ziaktu FB Meyer-a chu a chuang ve a. A chuanpui mi tam tak hnenah chuan Pathian thu a hrilh a, ṭawngṭai thiltihtheihna pawh a hrilh ṭhin a ni.

An zingah chuan Pathian awm ring lo mi tam tak pawh an chuang ve tho a, chung zinga pakhat chuan Meyer-a thusawi chu a lo ngaithla a, Pathianin ṭawngtaṭ a chhan dan a sawite chu a awih lo a, engahmah a ngai duh lo a. A ṭhiante hnenah, “Ka ring chuang lo ve” tiin Meyer-a thusawi chu a sawi chhia a.

Vawikhat chu Meyer-a te inkawmnaah chuan eng nge an sawi dan va zir turin kal a tum leh a. A kal hma chuan serthlum pahnih a ak a, ei atan a ti a ni. Mahse a kalkawngah hmeichhe pakhat, khawngaihthlak hmel tak hi lawng chhuat kil sirah chuan lo bawk nguai mai chu a hmu a, a harh huna mak a tih turin a serthlum pahnih chu a kut bulah chuan a dah a, nuih deuh pah chuan a kalsan ta a.

Meyer-a te inkawmnaa a kal zo a let leh chu hmeichhia khan serthlum chu a lo ei a, “Ka pi, a tui i ti em, i lawm em” a ti a. Hmeichhia chuan, “A tui khawp mai, Pathian hnenah serthlum pahnih ka muthilh laia ka kut bula min lo dah sak turin ka dil a, ka muthilh laiin ka ṭawngṭaina Pathianin a rawn chhang a, he serthlum pahnih hi ka kut bula a lo dah chu a nih hi, ka lawm khawp mai” a ti a. Chupa chuan mak a ti em em a, a hnu-ah phei chuan Pathian ringtu a lo ni ta hial a ni.

MARKA 11:24 – Chuvângin, ka hrilh a che u, in ṭawngṭaia in thil dîl apiang hmu tawhah inngai ula, tihsak in ni ang.