PATHIAN CHHANNA

FILIPI 4:19
Ka Pathian chuan Krista Isuaa a hausakna ropui tak aṭangin in mamawh tinrêng a pe ang che u.

Mihringten a thim zawng emaw a harsa zawng emaw a beidawnthlâk zawnga kan ngaih apiangah Pathian chuan a êng zawngin emaw a thlamuan zawngin emaw min tiamna Bible-ah kan hmu vek a ni.

A theih loh kan tihin ani erawh chuan, “Mihring tih theih loh hi Pathian chuan a ti thei asin,” a ti a. (LUKA 18:27)

Ka thawkrim lutuk kan tihin ani erawh chuan, “Nangni thawk rim leh phurrit phur zawng zawngte u, ka hnênah lo kal ula, keiman ka lo chawlhtîr ang che u.” a ti. (MATHAIA 11:28)

Tumahin min hmangaih lo kan tihin ani erawh chuan, “keiin ka hmangaih che u angin nangni pawh inhmangaih tawn rawh u.” a ti. (JOHANA 13:34)

Ka bei a dawng tawh a ni kan tihin ani erawh chuan, “I thiltih apiangah Lalpa hre reng ṭhîn la, I kawng a tihtluansak ang che.” a ti. (THUFINGTE 3:6)

Ka thei tawh lo a ni kan tihin, “Mi tichaktuah chuan engkim ka ti thei a ni.” tih kan hmu. (PHILIPPI 4:13)

Ka hlau kan tihin, “Pathian Thlarau kan chan hian min tidawih lo va, chakna te, hmangaihna te, mahni inthunun theihna te min pe zâwk a ni.” tih kan hmu. (2 TIMOTHEA 1:7)

Lungngaihna leh manganna hlira kan khahin, “in manganna zawng zawng ama chungah nghat vek rawh u; a ngaihtuah êm êm che u a ni.” tih kan hmu. (1 PETERA 5:7)

Beiseina nei tawh lote, lungngaihna leh manganna nei te, pachhia leh riangvaite Pathian kan neih hi hre rengin ṭanpui kan ngaihna zawng zawngte a hnenah i thlen ṭhin ang u.

Khawvela mi ropui tak takte ropui chhan i zirchian chuan an harsatna te, hlawhchhamna te chu remchangah an siam ṭhin vang a ni tih i hria ang.