LEHKHA CHHIAR

JOHANA 20:30-31
Isuan zirtîrte hmaah chuan chhinchhiahna thil mak dang tam tak a ti a, chûng chu he lehkhabuah hian ziak a ni lo. Isua chu Krista, Pathian Fapa a ni tih in rinna tûr leh, in rin avâng chuan ama hminga nun in neih nân hêng hi ziak a ni.

Thuziak hian thil a tithei a, lehkhabu ṭhain min hruai ṭhat theih em em laiin lehkhabu ṭha loin min hruai sual hle thei bawk.

John Wesley-a, theologian ropui tak chuan, “Inchhiar zau lo kristian chuan hma a sawn ngai lo ang a, inchhiar zau ṭhin kristian chuan hma a sawn ngei ang” a ti a ni.

Paris khawpui-ah America rama mipui hriathlawh leh miropui Benjamin Franklin-a leh a ṭhianten zanriah an kil ho dawn a, an inpuahchah lai chuan ṭhian pakhat chuan Franklin-a hnenah, “Khawvelah eng ang mi nge mi mawl bera i ngaih min hrilh thei em” tiin a zawt a. Franklin-a chuan, “Ruah sur laia pa awm mai mai, lehkhabu chhiar nachang hre lote chu mimawl ber an ni” tiin a chhang.

Chinese chuan an thufingah, “Ni thum chhung engmah kan chhiar loh chuan kan thusawi reng rengah finna pakhatmah a awm lo” an ti bawk.

Ziak leh chhiar thiam loh avanga lehkhabu chhiar ngai miah lo kan awm tawh awm lo ve. Chutih lai erawh chuan kan lehkhabu chhiar tur uluk takin kan thlang tur a ni. Chungah chuan heng hi kan inzawh a pawimawh; A rintlak em? A zirtirna a him em? Huapzo a ni em? Ṭan lam a nei em? tih thlengin kan ngaihtuah a tul a ni.

Kristian kan nih chuan kristian chhiar awm kan chhiar tur a ni a, a ngaihnawm lam ringawt aiin kan thlarau nun chawm thei tur leh nun kawng dika min kaihruai thei tur thlan thiam hi a finthlak a ni.

Lehkha chhiar hi kan ngaihtuahna leh rilru tan a ṭha a, kan taksa tan pawh exercise ṭha tak a ni reng. – Joseph Addison