THO LEH PATHIAN

ROM 6:9
Krista chu mitthi zîng ata kaihthawhin a awm a, a thi leh dâwn tawh lo tih kan hria, thihna chuan a chungah thu a nei tawh lo.

Tho leh Krista ringtute kan ni a, thihna hneha tho lehin a thlarau-a min awmpui tawh turin nungin vanah min lawn san a, min rawn hruai leh turin amah ngei chu a rawn kal leh dawn a, a kuta kilhna ser ngei chuan min la rawn hruai dawn a ni. Chu chu kan rinna leh kan beiseina thuril tak a ni.

Nikhat chu Muslim pa pakhat hian Kristian hnenah, “Nangni Kristiante nena kan danglamna a awm. Keini chu Medina-ah kan kalin mitthi kuangah Muhammad a takin hmuh turin a awm reng a. Mahse nangni Kristiante chu Jerusalem-a in kalin thlan ruak, engmah awm lo in hmu a ni lo ve’m ni?” a ti a.

Kristian chuan, “Ka lawm e, i sawi dik takzet. Keini kristian te hian thihna hneha tho leh Krista Pathian nung rawng chu kan bawl reng a ni” a ti.

Kum tak tak liam taah khan, Turkey rama missionary pakhat hian Muslim-te hnenah Isua an rinchhan hrilhfiah harsa a ti em em a. Mahse vawikhat chu an zin ho a, kawng an bona-ah chuan Muslim milim ‘Mi thianghlim’ an tih hi a awm a. Missionary chuan, “In mi thianghlim saw va zawt teh ang u khai” a ti a. Mahse Muslim-te chuan, “Minung lovin min chhang lo vang” an ti a. “Saw inah sawn mi pakhat a awm a, va zawt zawk teh ang u khai” an ti a. Missionary chuan chu chu remchangah a la a, “Mitthi tawh Muhammad-a chuan kawng a hrilh thei lo che u a ni. Mahse Isua Krista chu a nung a, amah in rin chuan a chhandam dawn che u a ni” a ti a.

1 KORINTH 15:14 – Krista kha kaihthawh a nih si loh chuan kan thu hril hi dâwt a ni ang a, dâwt ring lek in ni bawk ang.