AN SAWI ANG NI LO

AN SAWI ANG NI LO

LUKA 6:37
Mi sawisêl suh u; tichuan, sawisêl in ni lo vang; tu mah thiamlovah ruat mai hek suh u; tichuan, thiam loh in ni lo vang; ngaidam rawh u; tichuan, ngaihdam in ni ang.

Mi chanchin sawi châng kan nei ṭhin a, miten kan chanchin an sawi châng pawh a awm ang. Mahse mi sawi ang zawng zawngte hi kan lo ni ṭhin lo va, chuvangin a chhe zawnga mi chanchin kan sawi a nih phei chuan kan fimkhur hle tur a ni.

Vawikhat chu naupangho hi tualzawl nuam leh mual nuam takah lehkhachaih an chaih a. Naupang pakhat lehkhachaih chaih lai chu a chhe thut a, a bula huan zau tak, thirlêna in hung tlat chhûngah chuan a vir thla ta a. A ṭhiante chuan chu huan neitupa chu pa lian tak, hmuihmul nei khup mai a nih thu te, a huana lût apiangte chu a hauh hrep ṭhin thute an sawi a, a sual êm avangin an hmuh apiangin an tlanchhe ṭhin, tiin an sawi a.

Mahse chu naupang chuan a lehkhachaih chu a neih chhun, a pain a siam sak anih avângin a ui em em a, putar awm loh lai anih ringin thirlên aṭang chuan a lut ta a. Lehkhachaih chu lâk tuma a han ban chiah chu chu putar chuan a rawn ko ta a, “Mama, eng nge i tih a?” a rawn ti a. Chu naupang chuan a hlau ta em em mai a. Mahse putar chuan aw nem tak chuan, “Mama, eng nge i hlauh a, hlau suh, ka tina lo ang che” a ti a. A lehkhachaih chu a lak sak a, Gate thleng chuan a thlah ta a. “Hlau reng reng suh, i lo kał leh dawn anih pawhin Gate bula Bell hi i rawn hmet tawh dawn nia” a ti a, a kalsan ta a.

Tu’nge a nih kan sawi ṭhin ang ai hian mite hi an lo ṭha ṭhin a, mi sawi dan aṭang ringawta hmachhawn emaw dawnsawn emaw hi a tha ngai lo. Ṭha tak leh fel taka mi kan indawr chuan mi zawng zawng hian ṭhatna lai kan nei vek a ni. Chuvangin mi chanchin ṭha lo laite hi uchuak taka sawi tur a ni lo a. Chu chu ringtute tan phei chuan tih miah loh tur a ni.

MATHAIA 7:1 – Sawisêl suh u, sawisêla in awm loh nân.

Leave a Reply

Your email address will not be published. Required fields are marked *

Copyright © 2017 - 2020 Our Daily Bread Mizo.
Privacy Policy | Powered by MIZOHOSTING.