KRISTA HRIA

SAM 23:1-2
Lalpa chu min vêngtu a ni a, Ka tlachham lo vang. Ani chuan hlobet hring dup hmunahte min chawlhtîr a, Chawlhna tui kamahte chuan min hruai ṭhîn.

Kum tam tak liamta-ah khan party-na hmunah film changthiam lar tak hi a rawn kal ve a. Chutia a hmel an hmuh tak thut avangin kalkhawmte chuan thil tihsak turin an ngen a. An thil beisei chu recitation sawi sak turin a ni.

An zinga upa deuh ber chuan Sam 23-na ‘Lalpa chu min vengtu a ni a…’ tih kha sawi turin a ti a. Chupa chu a ner nawng a, tihhlawhtlin loh a hreh ve deuh bawk si a, a han ngawih deuh hnu chuan, “Ka pu, ka han sawi phawt ang a, ka ngen ve a che, ka sawi zawh-ah i sawi ve ang” a ti a.

Putar chuan, “Kei chuan ka sawi thei ve meuh tawh hleinem, ka tar tawh a, ka aw a fiah tawk tawh lo a, in hre thei tawh lo ang” a ti a.

Chupa chuan a han sawi ta a, a sawi thiam phian a, a fiah fel fai bawk a, a sawi zawh chuan kalkhawmte chuan kut an beng dar dar a. A sawi zawh takah chuan putar chu a rawn dingchhuak ve ta a, a han sawi ve chiah chu aw chau tawh tak a ni tih chu hai rual a ni lo. Mahse a sawi zo a han ṭhu chiah chu kalkhawmte zingah mit hul reng an awm lo.

An ngawih ṭhap lai chuan Film changthiam pa chu a rawn dingchhuak a, “Ṭhiante u, lo ngaihthla teh u, ka recitation sawi khan in mit leh beng a titlai ngei tih kha ka hmu chiang em em a, mahse kan pu hi chuan in thinlung khawih phâkin a sawi a ni. A danglamna chu hei hi a ni, keichuan Sam 23-na hi ka hria a ni mai a, mahse kan pu-a hi chuan, Lalpa, Beram vengtu (Shepherd) hi a hria a ni” a ti a.

Kan nunin Krista a hriatna hi sawi mai lova kan lantir hi a va pawimawh tak em. Chu chuan mi thinlung, mi nun a khawih ṭhin si a.

1 Korinth 4:1 – Keiniho hi Krista rawngbâwltuah leh Pathian thurûk enkawltuah miin min ngai rawh se.