NAUPANG NGAINAT

MATHAIA 19:14
Isua erawh chuan, “Naupangte ka hnênah han kaltîr ula, hnar suh u; vânram chu hêng ang mite ta hi a ni si a,” a ti a.

Milim kertu lar tak Thorvaldsen-a chuan vawikhat chu Lal Isua lim a ker a. A ang thei ang ber turin uluk takin ni rei tak a ker a. A ker zawh meuh chuan a an leh an loh sawi turin naupang pakhat a sawm a. Chu naupang chuan, “Mi ropui tak a ni ang” tiin a chhang a.

Thorvaldsen-a chuan naupang chhanna aṭang chuan a la ang tâwk lo-ah ngaiin a dang a siam leh ta a. A siam zawh chuan naupang dang a sawm leh a. Chu naupang chuan, “Lal Isua a nih hi, ‘naupangte ka hnenah han kal tir rawh u’ titu kha” tiin a chhang a. Thorvaldsen-a chu hlawhtling-ah a inngai ta a ni.

Naupang ngaihdan hi a dik tlangpui-ah a ngaih theih. Naupangin mifel taka an sawi chu an fel tlangpui ṭhin. Chutiang chiah chuan naupangten fel lo-a an ngaih leh suala an ngaihte hi kristian ṭha tak an ni lo tlangpui a tih theih awm e. Naupangte hian engtin nge min ngaih ve ang le!

Bible-ah khan Lal Isuan naupangte a hmangaihzia kan hmu a. Lal Isuan a hnena hruai tura a tih pawh khan a kianga awm kha an hlau lo tih kan hria. Mi ṭhenkhatte hi chu naupangin an hlau fo ṭhin.

Thuhriltu lâr tak pakhat chuan a bula naupangte an infiam bawrh bawrh ngam loh chuan chumi chu Isua hnungzuitu ṭha tak a ni lo ang, a ti hial a ni.

A zirtirten naupangin Lal Isua chimbuai an phal lo a, mahse chu chu Lal Isua ngaihdan a ni tlat lo. Lal Isua chuan tumah a hnar lo a, a buai em em lai pawhin amah pantu chu engtik lai pawhin a pawm reng thei a ni.

Lawmna-a khat rilru thianghlim. A mawi tuktin par aiin. Fak zai vawr rilru thianghlim. A ning lo tlaini lenin.