PÛK TIR

THUFINGTE 19:17
Rethei khawngaih hi Lalpa hnêna thil pûktîr ang a ni, I thiltih ang chu a rûl leh ngei ang che.

Mi tam takin, “He khawvel hi kan khualzinna ram mai a ni a, he lei rammi kan ni lo, nun lo la awm tur atana inbuatsaihna mai a ni” an ti ṭhin. Chu chu hre reng mah ila he leiah mahni ṭanghma haiin sum leh pai leh rohlu hrang hrang duhin Pathian duh loh zâwngin kristiante hi kan awm fo ṭhin a ni.

Bible-in “Vanah, sulrul leh tuiekin a ei chhiat lohnaah, rukruten an reh pawha an ruk hek lohnaah chuan, in tan rote khawl khâwm zâwk rawh u;” a tih pawh hi hre reng mah ila ringtute hian vana rokhawlkhawm dan kan thiam lo ṭhin.

Vawikhat chu pa pakhat hian a fapa hnenah cheng za a pe a. A pa chuan a duh duh dana hmang turin a ti a. Chawlhkar hnih a liam hnu chuan a pa chuan a pawisa pêk chu engtin nge a hman a zawt leh a.

A fapa chuan, “Mi ka pûk tir” a ti a. A pa chuan, “A pung a awm dâwn em ni?” a ti a. A fapa chuan, “Awm dawn teh reng mai” tiin a chhang a. A pa chuan, “Dahkham te an nei em, i chiang maw?” a ti leh a. A fapa chuan mahni inringtâwk tak leh hlim takin, “Ka pa, lungngai suh, a pung awmin ka hmu kir leh ngei ang. Pawisa chu mirethei, kan veng mawnga mi kha ka pûk tir a” tiin a chhang a. A pa chu a meng kawk a, “I va han å tak em! Engtin mah an pe lêt leh tawh lo ang che!” a ti ta hrep mai a. A fapa chuan, “Ka pa, Baibulin, ‘Mirethei khawngaih chuan Lalpa a pûk tir a ni a, a thiltih ṭhat chu a rûl ang’ a tih kha” a ti a.

A pa chu a inngaihtuah harh a, a lawm ta êm êm a. A iptea cheng 100 chu a pe leh ta a. A fapa chuan, “Ka pa, ka tih rêng kha! A pung a awm dâwn tih ka hria alawm. Tunah chuan 100% pung ka nei ta e. Mahse hetiang em em hian a pung ka hmu hma ang tih ka ring lo” a ti a.

1 TIMOTHEA 6:19 – Tichuan, nakin atân ro hlu tak an insiamsak a ni ang a, nunna tak tak chu an chang dâwn nia.