FEL A TAWK LO

EFESI 2:8
Rinna avânga khawngaihnaa chhandam in ni, chu chu in thawh chhuah a ni lo, Pathian thilpêk a ni.

Chinese thuhriltu pakhat, Andrew Chin-a hian vawi khat chu Indian lu mehna dâwr, Malaysia-ah a lêng lût a. Lu mêttu chuan a bakmeh chem (Razor) a tah hriam lai chuan, “Sakhaw mi ṭha tak ka ni a, chuvângin mi ṭha tak ka ni,” a ti a.

Andrew Chin-a chuan, “Ngawi teh, ka pu, ‘Khawvêla sakhua zawng zawngte hi an ṭha tâwk lo a, an fel tâwk lo tih Bible-in ti hian min hrilh asin, ‘mi zawng zawngin thil an tisual tawh vek a, Pathian ropuina an chang zo ta lo a ni’ tiin. Chuvangin Pathianin a fapa, Isua Krista kan aia thi tûrin a rawn tîr a nih kha” a ti a.

Lu mêttu chuan, “En teh, ka theihtâwp ka chhuah a, ṭha takin ka nung a, ka thih hnu-ah chuan dinhmun ṭha tak ka chang ang,” a ti a. Andrew Chin-a chu a ngawi ta a.

Lu mêttu chu a bakcheh tah hriam pah chuan a ṭawng suam suam a. Chutih lai tak chuan Andrew Chin-a chuan a chhuhsak thut a, “keima’n hepa hi chu kan mehsak ang e,” a ti ta mai a. Lu mêttu chuan, “Ni lo, ni lo, i thiam lo ang, keimahin ka lo ti ang,” a ti a, an inchuh ta a.

Andrew Chin-a chuan, “Ka thiam ang tâwkin ka ti dâwn alawm, ka thiamna zawng zawng ka sâwmkhâwm ang a, ṭha takin ka ti ang,” a ti a. Lu mêttu chuan, “I thiamna te, i theihna te, i finna te, i ṭhatna te a tâwk lo, he customer hi chu keimah ngeiin ka tihsak ṭhin a ni,” a ti a.

Andrew Chin-a chuan bakcheh a pêk pah chuan, “I ṭhatna leh felna zawng zawng kha Pathian pawhin tâwk a ti lo a, ṭha ni-a kan inhriatna te hi a mithmuh-ah chuan a tenawm êm êm a ni. Rinna avânga khawngaihna avânga chhandam i ni, nangma thawhchhuah a ni lo, chu min thawhsakna chu kan rin a ngai a ni,” a ti a.

ROM 3:12 – An pêng bo ta vek a, an khawlo zo ta a; Tu mah thil ṭha ti rêng an awm lo, pakhat mah an awm lo.