MANA LEI KAN NI

1 KORINTH 6:19-20
A nih leh, in taksa chu, in chhûnga awm Pathian hnên aṭanga in hmuh, Thlarau Thianghlim in a ni tih in hre lo em ni le? Mahni ta pawh in ni lo va, mana lei in ni tawh asin; chuvângin, in taksaah chuan Pathian chawimawi rawh u.

Hlumbêl siam thiam tak Chinese pa pakhat hi a awm a, vawi khat chu an Emperor-in thlêng ṭha leh mawi tak, a siam tawh zawng zawng aia ṭha ber siam tûrin a rawn ti a. Chinese pa chuan a han siam a han siam a, mahse Emperor duhthu a sâm thei lo. A mangang chuan a hlum chhuanna meipuiah chuan amah leh amah a inpumpêk a, chutah le, thlêng mawi tak leh danglam tak chu a rawn insiam chhuak ta a ni. Emperor lungawina tûrin hlumbêl siamtu chu a inpumpêk a ngai a nih chu.

Bawih neih hun lai khân vawi khat chu tleirawl fel hmel tak hi hralh tûrin an rawn dinchhuah tîr a. A laiah chuan din tîrin mipui tam takin an din hual a. An lei ngamna zât ṭheuh an sawi huai huai lai chuan Pa felfai takin Dollar 1400 a lei a rawn dîl a, midang aia a ngam huai avangin a lei a, a hruai haw ta a ni.

Chu hmeichhe naupang chu a ṭap zawih zawih a, a zâm nasa êm êm mai a, a u leh naute, a nu leh pate hmuh phâk loha a awm bo tûr te, engtin nge amah leituten an tihduhdah dâwn ngaihtuah chung rengin an inzui haw ta a ni.

A tûk zîngah chuan chu pa chuan tleirawl bawrhsawm tak bulah chuan a han kal a, lehkha them a pe a, tleirawl chuan, “Eng nge a awmzia?” a ti a. Chupa chuan, “Nangmah ka leina Receipt a nih kha, tunah chuan ka lei tawh che a, i zalên ta e,” a ti ta hlauh mai a. Chu tleirawl chuan mak a ti êm êm a, “Ka pu, ka pu, ka lâwm e, mahse i chhiahhlawh ka lo ni ang e, zui che ka duh e,” a ti a ni.

A va ropui em! A chunga kan sawi mi pahnihte khian kan tâna Lal Isua inpumpêkna te, kan tawrh ai tuara a vuakna vuala min tihdamna ropuizia a puang chhuak hauh lo ang. Amaherawhchu, mana lei kan nih tawhna te hi i hre nawn fo ang u.

PHILIPPI 2:8
Tin, mihring anga lo awmin a inngaitlâwm a, thi khawp hiala thu zâwmin a lo awm ta a, krawsa thihna ngei chu.