PATHIAN HRIATPUITU

ISAIA 43:10
Ka thuhretu i ni, Lalpa thuchhuak chuan a ti. Ka chhiahhlawh, ka thlan i ni, Min hre tûr leh min ring tûrin, Kei hi Pathian awm chhun ka ni tih hretu atân. Ka awm hmaa awm Pathian an awm lo va, Ka hnuah lah an awm hek lo vang.

Bristol khua, England ramah zankhat chu Damdawi ina hnathawkho chuan cocktail party an nei a. Cocktail Party chu zu chi hrang hrang inhona hunpui a ni ber ang chu. An zingah chuan Hindu Brahmin daktawr pakhat, Namboodripad-a a tel ve a. A sakhaw thurin a hre em em a. A sakhua-ah chuan a rinawm hle bawk.

Chu party-naah chuan zu hrang hrang an in a, dawhkan zau takah an ṭhu tlar dul mai a. Mahni bula mi ṭheuh kâwmin an hlim tlâng hle a. Chutih lai chuan nu pakhat, a hma dawhkana thei tui chiah inchhawp, zu telna in duh lo a hmu fuh a, Dr. Namboodripada chuan zu a in ve loh chhan a zawh chuan chu nu chuan Kristian a nih vanga in lo anih thuin a chhâng a. Mahse daktawr chuan, “Kristiante pawhin an in tho alawm hei” a ti a. Chu nu chuan, “Ni e, a nuna Isua Krista nei Kristian chu a nun a thianghlim a, hengah hian a intibawlhhlawh lo a ni” a ti a. A hnu-ah chu nu chuan Bible a present nghe nghe a ni.

Kum tam tak liam hnu-ah Dr. Namboodripad-a chu an ram, Kerela-ah a kîr a, Gideon Bible a chhiar aṭangin Pathianin a nunah thu a sawi a. Isua Krista chu chhandamtu-ah a pawm a, kristian a ni ve ta a. Brahmin hnam, Kristiana inlet chu a chhûngten an tuithlar a, a nupuiin a ṭhen a, mahse rinawm takin a awm a, Ludhiana-a Christian Medical College Principal a rawn ni ta hial mai a ni.

Hun te a liam zel a, a nupui pawh Kristian a rawn ni ve ta hial a, tichuan an chhungkua chuan Kristian chhungkaw ṭha tak, Pathian rawngbâwltu rinawm anni ta a ni.

Ringtu rinawm, phatsan ngai lo leh fel taka awm ṭhin chu Lalpan a chawimawi a, an nun aṭangin nasa takin Pathianin a ropuina a puangchhuak ṭhin a ni.