CHANNA

CHANNA

JOHANA 5:24
Thu dik tak ka hrilh a che u, tu pawh ka thu hriaa, mi tîrtu ring chuan chatuan nun a nei tawh, thiam loh changin a awm lo vang a, thihna ata nunnaah a lût tawh zâwk a ni.

Philippi khua-a mite hnena Tirhkoh Paula lehkha thawna thu ropui berte zinga mi chu bung 3, chang 8 leh chang 9-na kha a ni awm e. Heti angin; “Chu chang a ni lo, ka Lalpa Isua Krista hriatna hlu tak avângin thil engkim hi hlohnaah ka ngai a; Krista chu ka neih theih nân leh amah nên pumkhat kan nih theih nân, amah avângin engkim ka chân ta vek a, chûng chu bawlhhlawh ang lekah ka ngai a ni. Thiam chang ka nihna chu Dân zawm vâng ni lovin, Krista rin vâng zâwk a ni a, rin vânga Pathian hmaa thiam channa chu.” tiin.

Lal Isua avangin eng nge kan chân ve le? Chânna-a ruat theih tur kan neih leh neih loh inngaihtuah chungin Pandit Dharm Prakash Sharma-a piantharna ropuizia i han sawi teh ang.

Kum 1976, May thla khan Brother Bakht Singh-a rawngbawlna aṭangin a piangthar a. January ni 1, 1977 khan Prime Minister Indira Gandhi hnenah kalin Rajasthan Congress General Secretary hna banna a thehlut a. Politics-a inrawlh ai chuan Isua Krista hnungzuitu a nih duh thu leh thlaraubo chhanchhuak tura ke pên a duh zâwk thu a hriattir a. Prime Minister chuan a pawm hauh lo, mahse chungte chu hnawmhne-ah ngaiin Pathian rawngbâwl chu a thlang ta zâwk a ni.

A pi leh pute aṭang tawha Gandhiji te nena an inkungkaihna te a hai lo, khawvêla a nihna sâng tak, Rajasthan State-a Congress Party lian tak General Secretary a ni tih pawh a hai lo. Mahse Pathian fa nih a, a chhandamna chang a, thlamuanna leh lawmna chang a, chatuan nunna chan chu khaikhin rualah a ngai lo a. Chung zawng zawng ai chuan a thlang ta zâwk a ni.

KOLOSA 3:2 – Chung lam thilah in rilru nghat tlat ula, lei lam thilah chuan nghat suh u.

Leave a Reply

Your email address will not be published. Required fields are marked *

Copyright © 2017 - 2020 Our Daily Bread Mizo.
Privacy Policy | Powered by MIZOHOSTING.