DAKTAWR DIK LO

HEBRAI 4:15
Kan Puithiam lalber neih hi kan chak lohnate min hriatpui pha lo a ni lo va, keimahni ang bawka kawng tinrênga thlêmna tâwk tawh, sual si lo chu a ni.

Damlohna hrang hrang a tam êm êm a. Chung natna enkawl bîk tûr leh tidam tûr chuan thiamna hrang hrang nei dâktawr an awm ṭhin a ni a. Kan hâ a nat chuan lungchhertu hnênah kal lovin ha dâktawr kan pan ṭhin a, kan ruh a tliak anih chuan motor chhe siamna-ah lût lovin ruh dâktawr kan pan bawk ṭhin a nih hi.

Hong Kong Medical Centre phone chu a rawn ri rang rang a, a han biak chuan aw felfai takin, “Dr. Dave ka be thei ang em?” a rawn ti a. “Aw hei hi Dr. Dave-a a ni e,” tiin Dr. Dave-a chuan a lo chhâng a.

A rawn betu chuan, “Willy Smith ka ni a, nang nêna inhmuh ka duh a, a remchang ang em? Ka hriselna zawng zawng hi a ṭhat leh ṭhat loh en a ngai a,” a ti a. Dr. Dave-a chuan, “A pawi hle mai, Mr. Smith, ka ti ngai lo a,” a ti ta mai a. Smith-a chuan, “Engati nge? Dâktawr, min puih ka ngai a lawm. Life Insurance ka tihna-ah medical report ka thehluh a ngai a,” a ti a.

Dr. Dave-a chuan nui huah huah chungin, “Ṭhianpa, kei chuan mipa ka check-up ngai lo, hmeichhe lam specialist ka ni a, naupai-hote hi ka hnêna rawn kal ṭhin chu an ni a. Nangmah ka en che chuan kum 30 hnulama ka mipa endik hmasak ber i ni ang!” a ti a. Mr. Smith chu a hlawhchham chiang hle.

Damlohna kan neih chuan chumi bîka dâktawr thiam ber chu kan zawnga, kan pan ṭhin a, tumahin dâktawr dik lo kan pan ngai awm lo e. Dâktawr dik leh thiam, pan tûr dik tak ni bawk kan pan chuan kan natna leh damlohna te chu min lo tihdam sak thuai dawn a ni.

Hetiang chiah hian, rinna kawngah harsatna kan tâwk a ni emaw, insiamthar kan ngai a nih a, thlarau damlohna kan nei anih chuan ṭanpuitu leh puitu kan mamawh a, chung hunah chuan Pathian mi, rawngbâwltu ṭha tak ṭhiante kan pan mai t3r a ni. Damna kim chang tûra pawimawh ber chu min hmangaihtu Isua Krista pan hi a ni. Damna kim Lal Isuaah chiah a awm si a.