AMAHA AWM

1 JOHANA 4:7
Duh takte u, i inhmangaih tawn teh ang u; hmangaihna chu Pathian aṭanga lo chhuak a ni si a; tu pawh hmangaihna nei chu Pathian hrin an ni a, Pathian an hre bawk a ni.

Mother Teresa-in ‘Tunge nunna chu?’ tih a ziah-ah chuan hmangaihna leh ṭawngṭaina inzawm dan mawi takin a sawi a. A pahnih chuan kan nitin nuna a lan theihna a awm a ni. Hetiang hian a sawi:

“Kan zavaiin, kan ṭawngṭaipui ngeite pawh i ṭawngṭaisak ṭhin ang u, Pathianin min hmangaih kan duh ang bawk leh min hmangaih ang ngeiin keini pawh chu ṭawngṭaisakna avang chuan kan inhmangaihna a lang a, Pathianin min hmangaih kan duh ang bawkin a hmangaih kan induhpui tur a ni.

Ka theihnghilh ngai reng reng loh chu kawtthler zau takah mi pakhat, kum upa lam tawh tak hi amah chauhvin khawhar tak leh riangvai takin a lo awm a. Ka khawngaih em avangin a awmna lam ka pan nghal a, ka kutin chibai ka bûk ta ringawt a.

Ka kut hi Pathian zarah engtik lai pawhin a lum ther ther reng ṭhin a. Chu putar chuan min rawn en pah chuan a nui deuh suk a, ‘Ka pi, hun rei tawh tak aṭang khan kut lum khawihna hi ka tawng tawh lo a, ka lawm takzet a ni, i kut lum nuam tak avang khan’ a ti a.

Kan thil tih ho takte hi midangte tan a ropuiin a lo mawi thei hlê a ni tih a lang chiang êm êm a. Chu hmangaihna leh ngilneihna chu kan chhungkaw chungah i lantîr ve ang u.

Ṭawngṭaina inah chuan hmangaihna a awm a, hmangaihna inah chuan inpumkhatna te, inlungrualna te, hlimna te a awm a, ṭawngṭainain hmun pawimawh a chang ngei bawk ṭhin.” tiin.

Chhungkaw ṭhenkhat chu chhûng inkhawm an nei zawh hian an inchibai liam liam ṭhin a, hengte hi tih ve theih chuan a va ṭha ngai em.

EFESI 6:18 – Ṭawngṭai fo ula, Pathian chu in mamawh apiang dîl ula, Thlarau hruai ang zêlin eng hunah pawh ṭawngṭai rawh u. In ṭawngṭainaah chuan mi thianghlim zawng zawng tân bâng lovin dîl rawh u.

avatar
  Subscribe  
Notify of
Copyright © 2017-2019 Our Daily Bread Mizo.
Privacy Policy