KAN ZIN KAWNG KHAWHAR

Isaia 43:2
Tuite in dai kai lai pawhin kei in hnênah ka awm ang a; luite in dai kai lai pawhin a chîm pil lo vang che u. Meia in kal tlang lai pawhin in kâng lo vang a, meialhin a tialh hek lo vang che u.

Kittie L. Suffield te chhungkua chu an zin a, an chuanna Rêl (Train) chu vûr tla nasa lutuk avangin a tâng ta tlat mai a. Khua a vâwt si a, passenger-te chu vûr tlain a hmet hlum takngial dawn a. An zînga mipakhat chuan chu chu hre rengin huaisen takin a pênchhuak a, Rêl-a an tânna bul lawka huan enkawltu in (Farmhouse) ah chuan va kalin chu khaw vâwt hnuaiah chuan Farmhouse-a lo riak, Fred Suffield chu a va kai tho ta a. An dinhmun a hrilh hnu chuan an khawnvâr êng chu chhiin ṭanpui theih dan kawng an dap ta a. Passenger tam takte tân Farmhouse-ah chuan intih lumna siam sakin an dam chhuak ta hial a ni.

Hun rei tak hnu-ah chuan Kittie chuan Fred Suffield-a hnenah chuan lawmthu sawina lehkha a thawn a. An inbe chhunzawm zêl a, an lo innei ta hial a. Chu zinkawng khawhar tak chuan nupa ṭha tak a pêk bakah ringtute tân hla ṭha tak kan lo neih phah ta bawk a ni.

Chu hla chu Kristian Hla bu No. 513-na ‘Kan zin kawng khawhar takah hian’ tih kha a ni.

Wesleyan Pastor, George Beverly Shea-a pa rawngbâwlnaah Fred Suffield-a chu a piangthar a. Kittie nen chuan an nupa-in an zui ve ta zêl a, rawngbâwlna chanvo te pawh an nei ve ṭhin a ni.

“Kan zin kawng khawhâr takah hian,
Harsatna tâwk mah ila;
Lalpa nên chuan vânram a chang ṭhin,
A mite min vêng reng ṭhin.

Lal Isua nên engkim a ropui,
Lungngaih tuifâwn kârah pawh;
Lallukhum chu kan chang ngei ang,
Lal Isua kan zui tlat chuan.

Kan thawhrimna kan zawh hunin,
Kan zin kawng kan pelh hunin;
Anin min lâwm ang, a ramah chuan,
‘Lo haw rawh, lo châwl tawh la’ tiin.

Sam 139:5 – Nangin ka hnung lam leh ka hma lamah mi hual a, Ka chungah i kut i nghat bawk a.