PATHIAN CHU HMANGAIHNA

PATHIAN CHU HMANGAIHNA

1 Johana 4:16
Pathianin keimahnia hmangaihna a neih chu kan hria a, kan ring bawk a ni. Pathian chu hmangaihna a ni; hmangaihnaa awm reng chu Pathianah a awm reng a, Pathian pawh amahah a awm reng a ni.

Vawikhat chu Boston khua-ah mi thiam tak mai pakhat, Kristian, Krista nei si lo hi Sadhu Sundar Singh-a hnenah a rawn kal a, tihian a rawn ti a, “Pathian hi hmangaihna anih si chuan engatinge khawvêl aṭanga a inthuhruk? Rawn inlanchiantirin mihringte hi an dik lohna leh an chhiatna ata rawn chhanchhuak tur a ni lawm ni?” a ti a.

Sadhu-a chuan, “Krista chu khawvêl hnenah a rawn inhriattîr tawh a, tunah pawh hian a thinlung zawng zawnga amah zawngtu hnenah chuan a inhriattîr zêl a ni. ‘Pathian chu hmangaihna a ni’ tih hi a dik a, mahse chumi rual vêk chuan thil bawlhhlawh leh thianghlim lo chu a kanral ṭhin avangin mi kanral hmang mei pawh a ni nghal bawk.

Ni lumna leh a ênna chuan thing leh thlai ṭhanna a ṭanpui a, mahse thing leh thlai kûng hrisel lo chuan chu Ni vêk chu a vuai phahin a thih phah ṭhin. Chu Ni chu tihdik loh a ni lo a, thlai kûngah chuan dik lohna a lo awmsa vâng a ni zâwk.

Chutiang bawkin Hmangaihna Pathian, Nunna êng chuan mitin hnenah thlarau lama ṭhanna a pe a, mahse chu nunna petu êng chu mi dik lo chuan a chhiat phah si ṭhin.

Pathianin khawvêla ama anpuia a siam mihringte tichhe ṭhintu chu a thu awih lova â taka khawsakna hi a ni. Chu chuan ama hmelmaah mihringte hi kan insiam zâwk ṭhin a ni e” tiin a chhâng a ni.

Mihring hian Pathian tel lova a khawsak phawt chuan amahah thil pawi a tawk nghal a. Thlarau lama a thil dawn theihna leh hriatna a lo thim a, atân leh midangte tâna pawi a lo thleng ta ṭhin a ni.

Hebrai 12:29 – Kan Pathian hi mi kan ral hmang mei a ni si a.

avatar
  Subscribe  
Notify of
Copyright © 2017-2019 Our Daily Bread Mizo.
Privacy Policy