NUNNA CHÂN

MATHAIA 10:39
Tu pawhin mahni nun humhim an tum chuan an chân ang a, keimah avânga an nun chân chuan an hmu ang.

China rama missionary-a awm tawh Ruth Bell Graham chuan a chanchin ziahna lehkhabu “It’s my turn” tihah chuan ti hian a ziak.

Oil Company pakhat hian China-a hna thar rawn thawh tumin hmâ a la a. Chu hmuna a hotupa ber ni tûr leh chu hna enkawl tûr chuan hnathawk tûr an zawng a.

An duhzâwng chu tlangval viak ṭha tak, University ṭha tak aṭanga pass chhuak leh hruaitu ṭha tak a ni a. Chu bâkah Chinese ṭawng thiam nâl tak an duh bawk a ni.

Chutiang mi chu an vâng êm êm a, mahse vanneihthlâk takin an duhzâwng tlangval pakhat, kum 28 mi an hmu ta a. Chu tlangval chu China rama missionary hna thawk reng tawh a ni a. Oil Company-in hna an thawhna hmun tûrah pawh lo chêng reng tawh a ni. Company chuan a rûkin chu tlangval missionary thiamna leh hriatna chu an zir rû a, an awt ta êm êm a, a hnathawh laia a hlawh zâtte an hriat meuh chuan hlawh ṭha zêwk pêk tumin an sâwm ta a.

A missionary hlawh aia a lêt sâwma tam hlawh pêk an tiam a. Mahse a lo hnar tlat mai le. Company chuan an han sân leh a. Mahse a hnar zêl a. Vawi 3 meuh a hlawh tûr sân an tum pawh chuan a hnar zêl ta si a. A sâwmtute chuan, “Eng nge i duh sawi rawh?” an ti a. Chu tlangval chuan, “Hlawh lam a ni lo ve ka pu, a hlawh chu a tam takzet a. Mahse hlawh aiin a hna zâwka hi a ni e. Oil hralh hna thawh chu tûna ka thawh nêna khaikhin chuan a tê lulai êm a ni,” a ti a.

Pathianin a rawngbâwl tûra a kohna-ah nghet takin a ding a, a hlawh chu beitham hle mah se a rawngbâwlsak Lal Isua erawh khawvêla hlawh tam takin a lei zawh lo a ni tlat si a ni.

MATHAIA 16:25 – Tu pawh mahni nun humhim tum chuan an chân ang a, tu pawh keimah avânga nun chân chuan an hmu ang.