THU BULTE

JOHANA 3:16
Pathianin khawvêl a hmangaih êm êm a; tichuan, a Fapa mal neih chhun a pe a, amah ring tawh phawt chu an boral lohva, chatuan nun an neih zâwk nân.

Rev. Sunny Abraham-a chuan a lehkhabu Pulpit Humour-ah heti hian min hrilh;

Japan rama Chanchin Ṭha puan chhuah a nihna hmasa ber chu kum tam tak liamta khan tlangval pakhat, Johann Sebastian Bach an tihin tuipui kama Pathian thuziak lehkha them a chhar aṭangin a ni, an ti a. JS Bach-a chu missionary hna lo thawk reng tawh ṭhin a ni.

Korea Lalnu (Queen of Korea) fa duhlai chu a thi a. A lungngai êm êm a, mahse an chhiahhlawh hmeichhe pakhat chuan vânrama a kal thu leh vânram chu an kalna tûr anih thu a hrilh a. Chu sala chhawr hmeichhia chu Korea rama chanchin ṭha puang chhuak hmasa ber tu a ni, an ti.

Telugu mite hnêna Pathian hnathawh ropui tak lo lang chu John Clough-a hnathawh vâng a ni a. John Clough-a chuan Engineering a zir a, a zir chhuah chuan tui kawng siam hna a hmu ta a, chutah chuan mi tam tak an chhawr a. Chung mite hnênah chuan ni tin Johana 3:16 thu, ”Pathianin khawvêl a hmangaih êm êm a; tichuan, a Fapa mal neih chhun a pe a, amah ring tawh phawt chu an boral lohva, chatuan nun an neih zâwk nân.” tih kha a sawi ṭhin a ni. A rah lo chhuak chu kum khat chhûngin mi 1000 chuang teh meuhin Baptisma an chan phah a ni.

Khawvêl-ah hian eng nge thil tlâwm ni a, eng nge thil ropuite tih hi sawi dân hrang hrang a awm ang. Pathian thil ropuina erawh chu thil tlâwm tak aṭangin puanchhuah a ni ṭhin hi a ni.

MATHAIA 23:12 – Tu pawh inngaihlu chu an tlâwm ang a, inngaitlâwm apiang chawimawi an ni ang.