TAWNG FIMKHURLO

JAKOBA 3:6
Lei pawh hi mei ang a ni a, khawlohna tinrênga khat, kan taksaa tel, kan taksa nun tibawlhhlawhtu a ni a, kan khawsak dân zawng zawng hremhmun meia tihrehawmtu a ni.

Nun hi fîmkhur taka hmang tûrin Pathian chuan min ti a. Kan nunah chuan kan ṭawngkam te, kan chezia te, kan thutlûkna te, kan duhzâwng te bâkah thil tam tak a awm thei a ni. Chung zîngah chuan kan ṭawngkam hi fimkhur a ngai lehzual hlê tih hriat a ṭha. Kan ṭawngkam chuan keimahni nun ngei bâkah mi nun a tihchhiat theih avângin a hlauhawm hle tih pawh hriat a ṭha hlê a ni. Fîmkhur a ṭulzia chu hetiang hian i han sawi leh teh ang:

Vawi khat chu nu pakhat hian mi sawi a hriat thawi aṭangin an ṭhenawm tlangvâl chu thil rûk chîng a ni tih a hria a. A hlau ta êm êm mai a, a hêk ta a, chu tlangvâl chu Police-ten an rawn man ta a.

Mahse chu tlangvâl chuan thil a lo ru ngai lo a, mi pangngai ve tak a ni tih Police-ten an finfiah ta si a. Thiamloh chantîr lovin an chhuah leh ta a ni.

Tlangvâl chuan a man tîrtu a hre kar mai si a, Court-ah a thlen ta a. Rorêltu chuan chu tlangvâl leh an ṭhenawm nu, amah hêktu chu a ko ta a. Court hma-ah chuan chu nu chuan miten rûkrûk chîng a nih thu an sawi avanga man tîr ta mai a nih thu a sawi a. Rorêltu chuan, “He lehkha-ah hian he tlangval i hêkna zawng zawng hi ziak la, i haw kawngah pawt thlêr vek la, kawng dungah i paih darh ang. Naktûkah rawn kal leh ang che.” a ti a.

A tûkah chuan chu nu chuan rorêltu chu a hmu leh a, Rorêltu chuan, “Thil dang kan tih hmain nimina i haw kawnga tlangvâl i hêkna thuziak i paih darh kha a vaiin va chhar khâwm la rawn la leh phawt ang che,” a ti a. Chu nu chuan, “Ka pu, a theih tawh lo ang, a ṭhen chu thliin a lên bo tawh ang,” a ti a.

Rorêltu chuan, “Ni reng ang chu, he tlangvâl i hêk chhiatna te khân a nun i timualpho a, i siamṭha thei tawh lo, i nun fimkhur la, i ṭawngkam pawh fimkhur takin hmang tawh ang che,” a ti a.

Mi nun tichhetu, timualphotu nilovin siamṭhatu nih i tum ang u, chu chu ringtute tih âwm rêng a ni si a.