THIANGHLIMNA

1 PETERA 1:14-16
Fa thuawihte angin awm ula, tûn hma, in hriat loh laia in châknate ang khân awm suh u. A kotu che u a thianghlim angin nangni pawh in chêt dân zawng zawngah lo thianghlim zâwk rawh u. “Kei ka thianghlim si a, nangni pawh in thianghlim tûr a ni,” Lehkha Thu-in a ti si a.

Thianghlim tih leh thianghlimna tih hi Bible-ah hian vawi 650 vel lai kan hmu a. Heta ṭang ngawt pawh hian Pathianin a ngai pawimawh a ni tih kan hre thei mai awm e. Thianghlim tih hi serh hran, hlang, thil dangin a pawlh loh, sawisel kai lo, fel, fai, mawi, nalh, fîm, etc. kan tihte hian a sawifiah mai awm e.

Thianghlimna hi Pathian nihnaa bet tel tlat a ni a. Chuvangin Pathian ringtu apiangte chu amah a thianghlim angin kan chêtzia zawng zawngah thianghlim tûra thupêk kan ni. Thianghlimna hian pâwn lamah pawh mawina leh hriselna a keng tel a, chuvangin kan inzirtîr uar zêl a pawimawh. Kan taksa, silhfen, mut bu, in leh a vêl, kawng leh vantlang khawsakhona hmun hrang hrangte pawh i tithianghlim deuh deuh ang u.