ZÛK LEH HMUAM

1 KORINTH 3:16-17
Pathian chênna in chu in ni tih leh Pathian Thlarau nangmahniah a chêng reng tih in hre lo vem ni? Mi tu pawhin chu in chu an tihkhawloh chuan, Pathianin anni chu a tikhawlo ve ang; Pathian chênna in chu a thianghlim si a, chu in chu in ni e.

Zûk leh hmuam kan tih hian vaihlo leh kuhva aṭanga siam thilte a kâwk tlângpui a. Mizoramah mipa zaa 73.6 in meizial an zu a, hmuam lam chi ti zaa 83.1 an awm bawk a. Hmeichhia zaa 16.1 in mei an zu a, hmuam lam chi ti zaa 60.8 an awm bawk (NFHS 2006). India ramah kum tin mi 55,000 zûk leh hmuam chîng thar an awm bawk. A chîng thar zaa 35 chu nu leh pate tihhmuh an ni a, zaa 6.1 chu an ṭhiante aṭangin a ni.

Zûk leh hmuam hian ṭantu a ngah a, ṭanchhan ṭha a nei lo thung. Kohhran pâwl hrang hrangte hian tun aia nasa hian do ngam ila, sorkar thuneitute pawh hian a khuahkhirhna dân (Tobacco Control Act-2003) kan neih hi tun aia nasa hian lekkawh ngam se a ṭha khawp ang. Pathian in tikhawlotu kan nih chuan Pathianin min tikhawlo ve mai dawn a ni.