A ṬUL LOVA SUM SENNA

ISAIA 55:2
Chaw ni si lovah eng vângin nge tangka in sên? Puar leh fânna ni si lovah eng vângin nge in tha in sên?

Hlâwkpuina sawi tûr awm ahnêka tlâkranna zâwng hlîra kan inhmanna chu zûk leh hmuamah hian a ni. A lei nana kan sum sen bâkah taksaa chak lohna leh natna a thlen tihdam leh nan sum tam zâwk hman a ṭul thin. Zirchiangtute sawi danin kum 2003-2004 vel khan Mizorama zûk leh hmuam atana kan sum sen dan hetiang hi a ni: Meizial-ah cheng nuai 5,475; Khaini-ah nuai 1,800; Sahdah-ah nuai 1,400, Tuibur-ah nuai 912, Pânkhawr-ah nuai 2,600; A vaiin nuai 12,187.

Chhungkaw ṭhenkhat chuan thla khat chhûngin Rs. 2000-4000 lai an lo seng a. Mahni hlawh tihpun duha nawr nawr ai chuan zûk leh hmuam bansan mai hi hlawh tihpunna ṭha tak a lo ni. Zûk leh hmuam kan tih loh hian thla khatah cheng tam tak kan hlawh a lo ni reng mai. Chhungkuaa tih loh theih phei chu a man ava tam dawn êm!