THIANGHLIMNA – EIZAWNNAAH

THUFINGTE 13:11
Awlsam taka sum neih chu a ral thuai a, Harsa taka thawh chhuah chu a pung zêl ṭhîn.

Hna thawh tur duha phe huai huai kan ni a. Hna hmuhna tur anih chuan Certificate dik lo pawh hmang hreh lo, mi hming hawh pawh hreh lo, pian kum dik tak ziak duh lo pawh a awm theih. Hna emaw sum emaw hmuhna tura mahni inphalrâi te leh thamna pêkte hi a thianghlim lova. Chutiang bawkin thuneitu tan pawh dâwrtute hnên aṭanga beisei neih loh a ṭha. Thil dik lo hmanga eizawnna lungphum phûmtu chhûngkua chu a hlim zui tak tak thei ngai lo.

Politics-ah te, sorkar hnaah te, sumdawnna thilah te, contract thilah te leh mi hnuaia ni tina inhlawh ṭhinte pawhin rilru thianghlim kan put a pawimawh. Sorkar leh Kohhran khap thila sum hailuh chingte hian hlimna leh vanneihna aiin lungngaihna leh rûmna an umpha châwk. Kan chhungkua hian kan eizawnnaah hian rilru thianghlim kan pû em le?