LALPA RINCHHAN NUN

JEREMIA 17:5-8
Lalpa chuan heti hian a ti: “Mihring rinchhana, mihring bân tha chakna ringa, Lalpa hmusittu chuan ânchhia dawng rawh se. Ani chu thlalêr hnim ro rire ang a ni, Thil lo thleng tûr, thil ṭha a hmu lo vang, Thlalêr ram ro, lei al, tu ma luah lohvah chuan a chêng zâwk ang. Lalpa ringtu, innghah nâna Lalpa hmangtu chu, Chu mi chu tui kianga thing phun, lui kama zung kai, Khaw lum lo thleng pawh hlau lo, a hnah hring reng, khawkhên kum pawh pawisa lo, Rah ṭhulh chuang lo ang hi a ni.

Châng 5 leh châng 6-naah hian Lalpa aia mihring chakna rinchhantute chu ânchhe dawng tlâk lek an nih thu leh an chan a chauhzia kan hmu a. Châng 7 leh 8-naah hian Lalpa rinchhantute dinhmun leh chanvo hlutzia kan hmu bawk a. A khawi zâwkah nge kan innghah tih hi kan inzawh a pawimawh hlê a ni.

Harsatna chi hrang hrangin a tlâkbuaka buai leh mangang mai ṭhinte hi rinnaa zung nghet kaih lo, Pathian aia mihring bân chakna rinchhantu an ni duh hle. Mihring bân chakna ni lo vin, Lalpa chakna rinchhantu chhûngkua nih i tum ang u.