LÂWMTHU INHRILH

EPHESI 5:4
Zahmawh te, thu lawilo sawi te, fiamthu te pawh, chûng chu a mawi lo a ni; chûng tih ai chuan lâwm thu hrilh zâwk rawh u.

‘Lâwmthu’ tih hi kan Bible-ah vawi 66 lai kan hmu a. Hei hian Pathian hnênah leh kan mihring puite hnênah lâwmthu hrilh fo tur kan nihzia a tilang awm e. Kan Mizo pi leh pute khan ‘Ṭawngkam ṭhain sial a man’ an lo ti ṭhin a; ṭawngkam ṭha kan tihte zîngah lâwmthu inhrilh hi a langsar pâwl tak pawh a ni ang.

Kan Pathian hnênah hian lâwmthu sawi tûr hi ni tin zan tin a awm reng mai. Fapa, Isua Krista min pêk bâkah vawiin thlenga hmuh theih leh hmuh theih loh malsawmna kan dawng ṭhin hi a ropui a, lâwmthu hrilh mawlh mawlhna tham a ni.

Tin, chhûngkua angte pawh hian lâwmthu inhrilh fo hi a pawimawh a. Nu leh pate pawhin kan hriatreng tûr chu kan fate tân hian vawkpa sa aiin lâwmthu sawina ṭawngkam ṭha hi a tui zâwk daih tih hi a ni.