THLARAU PIANTHARNA

THLARAU PIANTHARNA

– Vanlalsanga Tochhawng
Khawbung

Pianthar tumin ṭan ila tawh ṭhin em? Vawi tam tak camp-ah lûtin ka piangthar thei lo i ti em? Ka piangthar tawh sia, ka dâ, tlu leh ṭhin i ti em? Ka piangthara, sual tih ka la châk hi eng nge a chhan tiin i inzawt ṭhin em? Heng zawng zawng hi keima nun ngeia ka lo dai ram aṭangin kan sawi ve ange aw.

A kum thuah chuan kum tam ala ral lo; ṭhangkhat lian zet chu a lo liam ve ta. Kum 2003-2004 bâwr vêl kha chuan mahni phâk ang tâwk leh, neih bâkin zû leh dendrite hnim bâk buaipui kan nei lo a ni ber a. Kum 2005 a lo inher chhuah chuan ka pa in camping-a lût ve tûrin min ti a. Thlaraua pianna tak chang silovin sande sikul chu ka ngai pawimawh êm êm a, rui kam nam chunga chawhnu inkhawm hi nuam kan tih zawng tak ala ni. Tleirâwl lai mah nise.

Camp-a kan lût anih chuan zû leh dendrite mangṭha nân tih ni awm takin kan han rui lût ve ngei kha a ni. Tichuan, a rim nam rum rum chung chuan Pathian thu chu kan ngaithla chho zêl a. Ṭhenkhat, rual u zâwkte chuan counsellor-te hnial dan an tum em ni tih tur khawpin chhaih phêt an tum a. A ṭhenin camp kan chhuak ang a, kan rui leh awm sia, zû ka in châk leh awmsia tiin, buana hma in an buan ber tûr chu an kherh ve nasa hlawm khawp kha a ni a. A lunglen thlâk duh ve hle mai.

Pathian thu ka ngaihthlâk leh, aw chhâng vek khawpa kan ṭawngṭaina te chuan nunah awmzia a rawn nei ṭan a. Dendrite hnim ka la châk êm êm lai leh, a them vel ka kuta la kai vêl chung chuan Chhandamna thu chu kan ngaithla a. Rual u ten zu in ka châk leh awmsia tia pianthar an huphurh thu an sawi reng lai chuan; kei chu, Chhandamna thu an sawi chuan ka nunah awmzia a nei hle thung a ni.

Chhandamtu chanchin leh Chhandamna chanchin ka lo hriata, ka lo rin ve em em tho kha kan thu ngaihthlâk chu a ni mai a. An sawithiamin a fiah deuh tih mai loh chu. Ka lo hriat tawh sa thû chuan ka nunah thu nung tharlâm ang diaiin a thawk a. Ka la hriat ngailoh ngaithla ang maiin a ngaihnawmin min hneh êm êm a. Chu chuan ṭawngṭai a tinuam a. Luhlul leh kawhmawh bâwl emaw, tih ṭhat duh loh tih vel kha keimah hian ka nei ngailo hrim hrim bawk nen. Thuawih takin engkim ka ti mai a ni.

Tichuan, pianthar tum êm êm a camping-a lût e tilo chuan, pianthar tum Vanlalsanga chu Pathianin Kraws-ah minlo khêngbet tih chu thu mai ni lo, rinna in a takin ka zu chang a. Keimahah mi thar Krista a nun tawh zâwk thu ka hriat te chuan ka nunah hian a ngaihawm hliah hliah a ni. Pianthar tum ka thih veleh mi thar keimahah a takin a rawn nung a. Kei erawh chu khenbeh daih ka lo ni tawh (Gal 2:20). Isua hian min Chhandam ve ta a ni lova, min Chhandam daih tawhna chu a takin ka chang ve ta chauh zâwk a ni.

Dendrite hnim châkna awm miah lova camp-aṭanga chhuah tum kha ni mah ila. Dendrite ka châk êm êm chung khân Lalpa’n min lo chhandam reng tawh a. Ka thiltih avânga misual ni ka ni lo va. Ka lo pianchhuah khân sualsa a lo piang ka ni tih inhriatna chuan, ṭhat tumna aiin mi ṭha awm chhun Isua neih mai khan ṭhatna famkim ka nei vek tih ka inhre chhuak a. Misual hian a ṭha awm chhun Isua chu ka pan a. Anin min lo pawm a, kei chu sual mah ila, fela puan ka lo ni zui ta a ni.

Lei leh vân Lalberin mi fela min puan miau tawh avangin; sual zui zêl kha ka tân a rem lo tih ka hria a. Dendrite hnim châk êm êm keimah la ni reng chung khan; ka nih miah lohna Krista chu ka nihnaa min puansak tu Pathian fakin kan zai a, kan lâm a, chu chu tun thlengin fak leh chawimawi hi ka nuna a serh zînga mei ang a lo ni chho zêl ta a nih hi. Pathian chu fakin awm rawh se.

Tichuan, camping boruak, hlim lámna te chu a lo reh a. Nunkhua a lo har ṭan ta. Châk chung chunga ka pianthar san dendrite chuan a zùn ngaihna tinrêngin nun chhungril a rawn bual khat a. Pumpui a chawk let a. A rim ringawt chuan chhûngril hi a zem hian a zem let but but mai a. Châk avangin thlanin min bual a. Tih tur (hîp tur) a awm, hîp thei pawh ka la ni reng, hîp dân pawh ka la thiam. Mahse, ka sualna avânga tuar a, sual lak ata min tlan chhuak a, ka sualte ngaidamtu Pathian avâng chuan ka châk êm êm chu ka hîp lo va.

Ka châk êm êm laia ka kalsan ngamna chuan ka thlarau nun a ti chak zêl a. Tihsuala ka tlûk loh nân tih loh suala tlûk ka tum lo va. Ka tih tur zâwk nia ka hriat, inkhawm, ṭawngṭai, bible chhiar te chu suala ka tlûk lohna tura ka tih tûr a ni tih ka hria a. Chûng thil pathum chu hmeichhe samzai phiar ang maiin ka nunah ka kal kawp tîr reng a ni. A chhan chu, tih tûr ka tih loh chuan tih loh tûr ka ti dâwn tih ka inhriat avangin. (Kan sipikar te khan an sawi vek sia.)

Mahni ka in en chuan ka piantharna lâi ka zuk hmu chuang lo va. Keimahah chuan dendrite duh, dâwt sawi hrât; mahnia sual awm tinrêng ka zuk hmu a. Chuti chung chuan Chhandam ka ni tlat. Mahse, Krista ka en erawh chuan; amah chu ka mawina, ka felna, thianghlimna, ṭhatna a ni tih ka hria a ni (1 Kor 1:29-30). Keima lama awm te chu nitina ka thihsan theihnan ani chuan a nun hlu tak, hnehtu nun ngei chu ka nun thar atân min pêk avangin ka nun chu nitin indo nun a lo ni chho ta a ni.

Ka châk êm êm ṭhin dendrite chu tunah chuan châk chu sawi loh, hman ṭangkai dân ka thiam tawh a. Mahse, thlemna hi kawng hrang hrangin, chi hrang hrangin ka dawng ve reng tho a ni. A hring ahrâna Isua meuh pawh thlem ngam Setana chuan; kei, ama nun nei a, a lo awm tawh ṭhinna nun phei chu min neih lêt leh tumin nasa takin min thlem a ṭhulh lo ang tih hi ring ila, inring renga awmin, rilru lam indona hi kan nei reng a ni tih hriain, chhûngril lama kan duhthlanna fîm tak hmanga Krista kan thlan ngamna zêlah sual chu nitin hnehin a awm zêl dawn a ni tih hi i hre reng ang u.

NOTE:
Keini hi kan piangthar a ni lo va, mi thar Krista chu keimahniah hian a lo piangthar ta zâwk a. Chu chu Lalpa’n kan pianna thar atân min pawm sak ta zâwk a ni. Nang leh keia nun chu khenbeh tâwk chauha ṭha, thi tlâk leka nung a ni a. Mi nung Krista chu mitthi tawh chhûngah nungin, keimahni lamah thihnaa a thawh zelna nunah tho leh nun chu a lo lang chhuak ta zâwk ṭhin a ni. Engti zawng pawn confi tawp rawh, Setana’n a inrinhlelh tir ang che nga, Pathianin rin tur Krista a pe thung che. Duhthlanna chu i kut a ni e.

avatar
10 Comment threads
0 Thread replies
0 Followers
 
Most reacted comment
Hottest comment thread
10 Comment authors
BibiSolomona thihlumpuiteiThapuii ZoteHmuni Recent comment authors
  Subscribe  
newest oldest most voted
Notify of
lonelycowboy
Member
lonelycowboy

Amen 🙏

Marovi
Guest
Marovi

Amen

Tenuna
Guest
Tenuna

A tha hle mai.

Diki Khawlhring
Guest
Diki Khawlhring

a va tha emm

Lucy
Guest
Lucy

Amen

Hmuni
Guest
Hmuni

A ropui hle mai.

Thapuii Zote
Guest
Thapuii Zote

Bible ka chhiar hian hei Chu a Nilo deuh maw tiin ka ngaihtuah thin,ringhlelna te a awm thin kha ringhlelna kha setana hmangrua a ni t ka hre ta he thu atang hian.

puitei
Guest
puitei

amen 🙏

Solomona thihlum
Guest
Solomona thihlum

chhiar a nuamin,min khwih hle ani

Bibi
Guest
Bibi

Amen….A ropui e

Copyright © 2017-2019 Our Daily Bread Mizo.
Privacy Policy