BAWHCHHIATNA ZÊP LOH

THUFINGTE 28:13
A bawhchhiatna zêptu chu a hmuingîl lo vang a, Inpuanga sim erawh chuan zahngaihna a hmu ang.

Pathian ringtu pawh ni ila thil tisual thei dinhmuna ding reng kan ni a. Tihsual tam tak kan nei bawk ṭhin. Tisual thei kan nih leh tisual ṭhin kan nih hi kan Pathian pawhin a hrechiang hle. Hetiang anih avâng hian a duh loh zâwng tak thil kan lo ti anih pawhin, tihtak zeta a hnêna inpuang a, thupha châwi a, kan sim tak zet chuan min ngaidam duh a ni tih kan hriat a pawimawh. Lal Davida pawhin –

Ka sualna chu i hmaah ka rawn puang a, Ka khawlohna ka zêp hek lo. “Lalpa hnênah ka bawhchhiatna thupha ka chawi teh ang,” ka ti a. Tichuan, ka sualna zawng zawng chu i lo ngaidam ta a. (Sam 32:5) a tih kha.

Pathian zahngaihna dawng tura pawimawh chu Pathian hnena kan sual puan a, sual hawisan a, Lalpa hnena tlûkluh a ni.