NAUTE ṬAP

NAUTE ṬAP

LUKA 18:7
A mi thlan, a chhûn a zâna amah autute thu chu Pathian chuan a chinfelsak thuai dâwn lâwm ni? A muangchâng dâwn em ni?

Nimin lamah naute lo piang thar chanchin kan sawi a. Vawiinah chuan naute thiltih kan sawi ve thung dâwn a ni.

Naute lo piangin a tih hmasak ber chu ṭah a ni. A ril a ṭamin a ṭap a, hlauhawm a hriatin a ṭap a, awmtu leh duattu a neih loh chuan a ṭap a. A duhzawng tihsaktu tur mamawhin a ṭap bawk ṭhin.

Hetiang chiah hian piangtharte pawhin ṭanpuina mamawhin ṭap chungin, “Abba! (Ka pa!)” kan lo ti ṭhin a. ‘Fa in ni tih a chian nân Pathian chuan a Fapa Thlarau chu kan thinlung chhûngah a rawn tîr a, “Abba, ka Pa,” tiin a au chhuak ṭhîn.’ a tih ang khan (Galatia 4:6).

Israel fate khan mangang tak leh ruma an awm lai khan ṭap chungin Pathian an au va (Exodus 2:23-25). Pathian chuan a rawn ṭanpui ta a nih kha.

Exodus 3:7 ah, ‘Lalpa chuan, “Aigupta rama awm, ka mite tuar nasatzia ka hmu reng a ni; chhawrtute avânga an rûm thâwm pawh ka hria.’ a ti.

Thlamuantu Pa kan nei hi a van lawmawm êm. Kan lungngaiha amah kotu an awmin min kalsan ngai lo. Lal Davida chuan, ‘Ka koh hun che chuan ka hmêlmate an tlânchhia ang, Pathian chu ka lama ṭang a nih ka hre si a.’ a ti (SAM 56:9).

Lal Davida vêkin, ‘Mi dikte chuan Lalpa an au va, anin a lo hria a, An manganna zawng zawngah a chhan chhuak a.’ a ti (SAM 34:17). ‘Mi dikte chu Lalpan a en reng a, Ṭanpui dîla an au a ngaithla ṭhîn’ (SAM 34:15).

Isua Krista thisen avangin mi fel kan lo ni ta lo em ni. Kraws thisen avanga Pathian faa vuah kan nih chuan kan ṭap ri te leh amah kan auh ri chu a ngaithla dawn a ni.

Leave a Reply

Your email address will not be published. Required fields are marked *

Copyright © 2017 - 2020 Our Daily Bread Mizo.
Privacy Policy | Powered by MIZOHOSTING.