NAUTE MUHÎL

SAM 4:8
Thlamuang taka muin ka muhîl ang a, Nangmah ngei hi i ni, Lalpa , him taka min awmtîr ṭhîntu chu.

Naute muhîl hmuh hi thil hmuhnawm tak leh duhawm tak a ni a. A chhan chu an muhîl hmêl enin an thlâ a muang a, hlauhthawnna an nei lo tih a hriat a ni.

Pathian fate hi naute muhîl angin kan muhîl ve tur a lo ni. A chhan chu Engkimtithei thlazâr hnuaia kan awm avang a ni a (Sam 91:1). A Thlarâu Thianghlim chuan min veng a (Joh. 14:16), Angelte kut chuan min dawm reng a (Sam 91:12), Pathiana minung pathum chu kan hnênah a awm reng a (Joh. 14:23), engvangin nge thlamuang takin kan awm loh vang.

Mi tam tak chuan hringnun khawvêlah lungngaihna rit tak an inphur a, mahse Lal Isua chuan, “a tûk atân lungkham suh u” (Mat. 6:34) a ti. Chuvangin thlamuang takin nausen mu angin kan mu tur a ni, ani chuan min ngaihsak êm êm a ni tih tih tak meuhvin min hrilh kha. 1 Petera 5:7-ah chuan tihian kan hmu, “in manganna zawng zawng ama chungah nghat vek rawh u; a ngaihtuah êm êm che u a ni.” tiin.

Ringtuten hun harsa leh khirh tak tak tawh châng kan nei ṭhin a. Chung avângte chuan kan Pathiana thlamuanna leh hahdamna kan chan hi chang lovin kan ngaihtuahna te chuan phurrit lamah min hruai ṭhin.

Thlamuantu Pathian kan neih hi hre nawn leh ṭheuh ila, he khawvêla nun hahchawlhnaten rei an daih lo dawn chuang lova, dinhmun sâng leh hniamah pawh danglam ngai lo hahchawlhna tluantling nei turin kan Pathian nghêngin i nung ṭheuh ang u.

Sam 29:11 – Lalpa chuan a mite hnênah chakna a pe ang a, Lalpa chuan a mite chu thlamuannain mal a sâwm ang.