TAKSA THAWHLEHNA

1 KORINTH 15:42-44
Mitthi thawhlehna pawh chutiang bawk chu a ni ang. Ṭawih thei kha phûm a ni a, ṭawih thei lova kaihthawh a ni ang a, hmuhsitawm tak kha phûm a ni a, ropui taka kaihthawh a ni ang; chak lo tak kha phûm a ni a, thiltithei taka kaihthawh a ni ang. Kan phûm kha mihring lam taksa a ni a, kaihthawha awm tûr chu thlarau lam taksa a ni. Mihring lam taksa a awm chuan thlarau lam taksa pawh a awm ang.

Taksa thawhlehna hi Sadukaiten an ring lo va. Korinth khuaah pawh ring lo an awm avangin Tirhkoh Paula hian a hriattîr duh niin a lang.

Isua chu muhilte thawh hmahruaitu a ni a, keini pawh kan la tho leh dâwn a ni. Ṭawih theia tuh hi ṭawih thei lova kaihthawhin a la awm ang a, chawimawi lohva tuh hi ropui taka kaihthawhin a la awm ang a, chak lova tuh hi thiltihtheihna neia kaihthawhin a awm ang a, mihring lam taksaa tuh hi thlarau lam taksaa kaihthawhin a la awm ang. He thu hi ringtute tân chuan inhnemna tling, kan hlim kan lâwm êm êmna tur a ni. Hmangaih kal tate nên pawh kan la inhmu leh dâwn a ni tih taksa thawhlehna hian min hmuh fiahtîr a ni.