EI LEH INA FÎMKHUR

LUKA 21:34
Amaherawhchu, fîmkhur rawh u; chuti lo chuan, ei puar lutuk nên, zu ruih nên, dam chhûng khawsak ngaihtuah nên, in rilru a khat lutuk hlauh ang a, chumi ni chuan thang âwk angin thâwklehkhatan in chungah a lo thleng phut ang.

Mizote hi ei leh ina fîmkhur lo leh mahni taksa ngei pawh duat thiam lo pâwl tak kan ni awm e. Kan taksain a ngeih loh mai bâkah kan Bible pawhin a duh loh tih luih tlat kan chîng ṭhin hi a pawi hle. Kan nunna Pathian kuta awm a nih rualin kan taksa a lo hrisêl a, kan lo dam rei theihna tûra ei leh ina fîmkhur hi chu kan tih tûr pawimawh tak a ni.

Zu leh ruihhlo lam te leh zûk leh hmuam te bâkah kan hrisêlnain a tawrh phah theih lakah te hian insûm theih a pawimawh a. Thisen sângin vawksa a hua a ni tih hrereng chunga chhûngte hriat lohva lo ei rûk leh ṭhinte pawh hi chîn loh a ṭha. A thuhrimin kan duh zâwng leh tui tih zâwng anih avânga ei ṭeuh emaw in ṭeuh emaw hi chîng lovin, he lamah hian i fîmkhur ang u.