BEIDAWNG LO

THUFINGTE 15:5
Mi â chuan a pa thununna a ngainêp ṭhîn a, Zilhhauna ngaisâng chuan hmanghre takin a ti ṭhîn.

William Levine-a chu dinhmun derthawng takah a ding a. A chhan chu thla khat chhûngin a sa zawrhna dawr chu ṭum 4 ngawt nasa taka rawk a nih vang a ni a.

Tichuan a sa him nân kum 1980-a an siam chhuah chakai khawrh kawr kan tih mai, kawr chung bân bûl bulletproof ngat chu siam chhuah a nih veleh khan a lei a.

Mite chuan a kawr thar chu ṭha an ti a, mawi an ti pawh a ni mai thei, a leina dâwr an zâwt ta sup sup mai a. Chu chu remchângah lain William Levine-a chuan a kawr chu a hlâwma lain sumdâwn nân hmangin a duh ve te hnênah chuan a hralh chhâwng ta a. Hun a lo kal zêl a, a sa dawr aiin a hlâwk ta zâwka hriain Bulletproof kawr siama sumdâwnna lamah chuan a lût thûk zâwk ta a.

Hun a kal zêl a, Body Armor International-ah President hna a chelh chho thei ta dêr mai a. Kum 1980 tâwp lamah phei chuan ram hrang hrang 40-ah hralhtu pâwl a dinpui a, thla khatah bulletproof kawr 500-600 a hralh ṭhin a ni.

Aw le, tihian an sawi ṭhin; ‘serthluma an vawm che chuan serthlum tui in tûr tui tak siam nân lo hmang daih rawh’ tih hi.

I tlûk avangin i hlawhchham tihna a ni lova, chuta ṭanga i thawh ngai loh chuan i hlawhchham tihna a ni ang.

Mi â-te tân harsatna hi harsatna a ni a. Mifing tân chuan malsawmna a ni thung.